БОЗИҲОИ III КИШВАРҲОИ ИДМ. Дастаи мунтахабаи наврасони Тоҷикистон оид ба футбол тими Қирғизистонро шикаст дод

ДУШАНБЕ, 29.09.2025. /АМИТ «Ховар»/. Имрӯз дар доираи Бозиҳои III кишварҳои аъзои Иттиҳоди Давлатҳои Мустақил дастаи мунтахаби наврасони то 16-солаи Тоҷикистон оид ба футбол тими миллии наврасони то 16-солаи Қирғизистонро шикаст дод, хабар медиҳад шореҳи варзиши АМИТ «Ховар» Меҳрони Қурбон аз шаҳри Габалайи Ҷумҳурии Озарбойҷон.

Бозӣ дар Варзишгоҳи марказии шаҳри Габалай баргузор шуда, бо ҳисоби 7 бар 1 ба фоидаи дастаи мунтахаби наврасони то 16-солаи Тоҷикистон анҷом ёфт.

Ёдовар мешавем, ки Бозиҳои III кишварҳои аъзои Иттиҳоди Давлатҳои Мустақил зиёда аз 10 рӯз давом карда, дар он 2400 нафар аз кишварҳои Иттиҳод, ҳамчунин Туркия, Покистон, Уммон, Куба ва Кувайт иштирок менамоянд.

Ба ҳайати варзишии Тоҷикистон дар ин бозиҳо 208 нафар, аз ҷумла 142 варзишгар дохил мебошанд.

АКС аз манбаъҳои боз