Дар ноҳияи Рӯдакӣ ба 60 хонандаи ятиму камбизоат либоси мактабӣ тақдим гардид

РӮДАКӢ, 02.09.2025 /АМИТ «Ховар»/. Бахшида ба Рӯзи дониш ва ҷашни 34-солагии Истиқлоли давлатии Ҷумҳурии Тоҷикистон дар Боғи фарҳангию фароғатии ноҳияи Рӯдакӣ барномаи фарҳангӣ доир гардид, ки зимни он ба 60 нафар ятимону кӯдакони ниёзманд либосҳои мактабӣ ва дигар лавозимоти зарурӣ тақдим карда шуд. Дар ин хусус ба хабарнигори минтақавии АМИТ «Ховар» Субҳониддини Маҳмуд аз Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Зимни тақдими туҳфаҳо иброз гардид, ки ин иқдоми хайрхоҳона нишондиҳандаи таваҷҷуҳи доимии Президенти Тоҷикистон, Пешвои миллат муҳтарам Эмомалӣ Раҳмон нисбат ба масъалаҳои иҷтимоӣ ва таъмини шукуфоию пешрафти насли наврас мебошад. Роҳбарияти мамлакат ҳамеша нисбат ба ятимону камбизоатон таваҷҷуҳ ва ғамхорӣ зоҳир намуда, онҳоро танҳо намегузорад, то худро ятим ё бепарастор эҳсос накунанд.

Ҳукумати Ҷумҳурии Тоҷикистон барои беҳтар намудани сифати таҳсил ва фароҳам овардани шароити мусоид барои рушди маънавӣ ва ҷисмонии кӯдакон пайваста тадбирҳои амалӣ меандешад.

АКС: Мақомоти иҷроияи ҳокимияти давлатии ноҳияи Рӯдакӣ