Дар Вазорати корҳои дохилӣ бахшида ба 34-солагии Истиқлоли давлатӣ ҳамоиши идона доир гардид

ДУШАНБЕ, 04.09.2025. /АМИТ «Ховар»/. Истиқлолият барои ҳар давлату миллат, алалхусус мо, тоҷикон беҳтарин дастовард, арзиши олии давлатдорӣ ва нангу номуси ватандӯстӣ, инчунин ифтихор аз таъриху тамаддун ва фарҳанги бою оламшумули аҷдодонамон ба ҳисоб меравад. Истиқлолият шароит фароҳам овард, ки дар ин муддат дар тамоми соҳаҳои ҳаёт — сиёсату иқтисодиёт, саноату энергетика, кишоварзӣ ва илму фарҳанг мо ба комёбиву муваффақияти назаррас ноил гардем. Ин матлабро Вазири корҳои дохилии Ҷумҳурии Тоҷикистон Рамазон Раҳимзода 3 сентябр зимни баргузории ҳамоиши идона ба муносибати 34-солагии Истиқлолияти давлатии Ҷумҳурии Тоҷикистон баён намуд.

Дар ҷамъомад 41 нафар хизматчиёни мақомоти корҳои дохилӣ барои нишон додани масъулияти баланд дар иҷрои вазифаҳо, ошкору пешгирӣ намудани ҷинояткорӣ ва саҳми намоён гузоштан дар таъмини тартиботи ҷамъиятӣ бо мукофотҳои давлатӣ, зиёда аз 600 нафар бо мукофотҳои соҳавӣ, 21 нафар бо рутбаҳои махсуси навбатии полковникӣ, инчунин зиёда аз 40 нафар бо рутбаҳои махсуси навбатии як зина боло аз вазифаи ишғолнамудаи бастӣ сарфароз гардонида шуданд.

Дар ҳамоиш таъкид гардид ки ин неъмати бебаҳо имкон дод, ки мо бо дастовардҳои таърихӣ, маданияту фарҳанги оламшумул ва эъҷози сулҳофарию тамаддунпарварӣ ба ҷаҳониён исбот намоем, ки Тоҷикистон мамлакати куҳанбунёд буда, давоми таърихи ҳазорсола бо осору эҷоди гаронбаҳои фарзандони донишманди худ машҳур гардидааст.

Дар ҳамоиш аз талошу заҳматҳои Президенти Ҷумҳурии Тоҷикистон муҳтарам Эмомалӣ Раҳмон дар роҳи ҳифзи Истиқлолияти давлатӣ ва минбаъд устувору пойдор нигоҳ доштани дастовардҳои он ёдоварӣ карда шуд.

Иброз гардид, ки маҳз бо талошу кӯшишҳои пайгирона, хизмату заҳмати устуворона ва сиёсати хирадмандонаи Пешвои миллат муҳтарам Эмомалӣ Раҳмон тоҷикон ба ҳадафу мақсади ҳазорсолаи худ, ки аз бунёди ҷомеаи демократию ҳуқуқбунёд ва давлати аз нигоҳи сиёсӣ орому осуда иборат буд, расиданд.

Истиқлоли давлатӣ имкон фароҳам овард, ки фаъолияти муназзами тамоми бахшҳо, аз ҷумла соҳаҳои ҳифзи ҳуқуқу тартибот, сохторҳои низомиву қудратӣ таъмин гардад ва вобаста ба тақозои замону фазои орому осудаи давлати соҳибистиқлол дар сохторҳои он воҳидҳои нав ташкил карда шаванд.

Омили фароҳам намудани шароити мусоиди кору хизмат барои ҳайати шахсии ин мақомоти бонуфузи давлатӣ сабаб гардид, ки натиҷаҳои фаъолияти хизматии кормандони ин ниҳод бамаротиб беҳтар шуда, оромиву суботи ҷамъиятӣ таъмин карда шавад. Ҳамаи ин боис гардид, ки ҳайати шахсии Вазорати корҳои дохилӣ бо нишон додани салоҳияти баланд дар иҷрои вазифаю уҳдадориҳои хизматӣ боварии роҳбарияти олии мамлакатро сазовор гардад.

АКС: Вазорати корҳои дохилии Ҷумҳурии Тоҷикистон