Доир ба истиқлол ва дурнамои рушди иҷтимоӣ конференсияи байналмилалӣ баргузор гардид

ДУШАНБЕ, 17.09.2025 /АМИТ «Ховар»/. 16 сентябр бо ташаббуси Институти фалсафа, сиёсатшиносӣ ва ҳуқуқи ба номи А. Баҳоваддинови Академияи миллии илмҳои Тоҷикистон дар мавзуи «Истиқлол: дидгоҳ ва дурнамои рушди иҷтимоӣ» конференсияи илмӣ-назариявии байналмилалӣ баргузор гардид.

Тавре АМИТ «Ховар» бо истинод ба Академияи миллии илмҳо хабар медиҳад, дар конференсия олимони варзида аз Тоҷикистон, Қазоқистон ва Қирғизистон равандҳои ташаккули давлатдорӣ, низоми ҳуқуқӣ ва рушди иҷтимоӣ дар замони истиқлолро таҳлили ҳамаҷониба намуданд.

Иштирокчиён муҳимияти мавзуи истиқлолро дар замони муосир, бахусус дар шароити таҳдидҳои глобалӣ ва тағйирёбии сохтори геополитикӣ таъкид намуданд.

Иброз гардид, ки истиқлол танҳо мафҳуми сиёсӣ набуда, балки падидаи мураккаб ва бисёрҷабҳае аст, ки ҳама бахшҳои ҳаёти ҷомеа- аз низоми давлатдорӣ то фарҳанг ва шуури миллиро фаро мегирад.

Таъкид гардид, ки ин гуна ҳамоишҳо на танҳо ба таҳкими робитаҳои илмии байналмилалӣ мусоидат мекунанд, балки дар тарбияи насли нав дар руҳияи худшиносӣ, ватандӯстӣ ва масъулияти шаҳрвандӣ низ нақши муассир доранд.

АКС: Академияи миллии илмҳои Тоҷикистон