ҶОМИ ОСИЁ-2026. Дастаи олимпии Тоҷикистон (U-23) дар марҳилаи интихобӣ нахустин бозӣ доир менамояд

ДУШАНБЕ, 03.09.2025 /АМИТ «Ховар»/. Имрӯз, 3 сентябр дастаи олимпии Тоҷикистон (U-23) оид ба футбол дар марҳилаи интихобии Ҷоми Осиё-2026 дар гурӯҳи «К» нахустин бозӣ анҷом медиҳад.

Тавре ба АМИТ «Ховар» аз Федератсияи футболи Тоҷикистон хабар доданд, бозии дастаҳои мунтахаби олимпии Тоҷикистон ва Непал соати 21:00 дар Варзишгоҳи марказии ҷумҳуриявии шаҳри Душанбе оғоз мегардад.

Ёдовар мешавем, ки аз 3 то 9 сентябр дар Варзишгоҳи марказии ҷумҳуриявии шаҳри Душанбе марҳилаи интихобии Ҷоми Осиё-2026 байни дастаҳои то 23-сола доир мегардад.

Дастаи мунтахаби олимпии Тоҷикистон дар даври интихобӣ бо ҳамсолони худ аз Непал (3 сентябр), Филиппин (6 сентябр) ва Сурия (9 сентябр) бозӣ хоҳад кард. Ҳама рақобатҳо бо иштироки дастаи мо соати 21:00 оғоз мешаванд.

АКС: Федератсияи футболи Тоҷикистон