Дар Душанбе маҳфили адабии Шоири халқии Тоҷикистон Латофат Кенҷаева баргузор гардид

ДУШАНБЕ, 05.10.2025. /АМИТ «Ховар»/. 3 октябр дар шаҳри Душанбе  таҳти унвони «Ҳарири ноз» маҳфили адабии адиб ва рӯзноманигори шинохта, Шоири халқии Тоҷикистон Латофат Кенҷаева баргузор гардид. Дар ин хусус ба АМИТ «Ховар» аз Иттифоқи нависандагон хабар доданд.

Дар маҳфил иброз гардид, ки Латофат Кенҷаева аз ҷумлаи адибонест, ки на танҳо шеър менависад, балки ба кори нашр ҳам машғул буда, дар ин самт низ муваффақ шудааст.

Давоми ин солҳо маҷмуаҳои ашъори адиб бо номҳои «Лолаарӯсак», «Марҷони ранга», «Сандуқчаи марворид», «Афсонаи тиллонур», «Гурбаи Сомон ва чӯҷаи Ораш» ба табъ расидаанд.

Бояд гуфт, ки Латофат Кенҷаева на танҳо дар эҷоди ашъори бачагона ба камол расидааст, балки дар тарҷумаи ашъори барои кӯдакон таълифнамудаи шоирони халқҳои дигар низ маҳорат ва истеъдоди хос дорад. Аз ҷумла, маҷмуаи ашъори шоири рус Наталия Юркова «Моҳ ва фил»- ро бо сабку забони шевою рангини кӯдакона ба тоҷикӣ баргардонидааст.

Латофат Кенҷаева муаллифи беш аз 50 китоби насрию назмӣ барои кӯдакону наврасон мебошад. Ҳамчунин беш аз 700 мақолаю очерк иншо кардааст.

Асарҳои алоҳидаи ин адиб ба забонҳои русӣ, англисӣ, узбекӣ, беларусӣ ва украинӣ тарҷума карда шудаанд.

Бояд гуфт, ки хизматҳои Латофат Кенҷаева дар соҳаи матбуот ва адабиёт қадрдонӣ шуда, дорандаи унвонҳои ифтихории «Аълочии фарҳанги Ҷумҳурии Тоҷикистон» ва «Аълочии матбуоти Ҷумҳурии Тоҷикистон» мебошад. Адиб узви Иттифоқи нависандагон ва Иттифоқи журналистони Тоҷикистон аст.

Ба Латофат Кенҷаева бахшида ба 34-солагии Истиқлолияти давлатии Тоҷикистон унвони Шоири халқии Тоҷикистон дода шуд.

АКС аз манбаъҳои боз