Дар Самарқанд нахустин мулоқоти вазирони мудофиаи кишварҳои Осиёи Марказӣ баргузор гардид

ДУШАНБЕ, 22.10.2025. /АМИТ «Ховар»/. 20 октябр дар шаҳри Самарқанди Узбекистон нахустин мулоқоти вазирони мудофиаи кишварҳои Осиёи Марказӣ баргузор шуд, ки дар он Вазири мудофиаи Ҷумҳурии Тоҷикистон Эмомалӣ Собирзода иштирок намуд. Дар ин хусус АМИТ «Ховар» бо истинод ба маркази матбуот ва иттилооти Вазорати мудофиаи Ҷумҳурии Тоҷикистон хабар медиҳад.

Дар Маркази сайёҳии «Silk Road Samarkand» ҷаласаи васеи вазирони мудофиаи кишварҳои дӯсту бародар баргузор гардид. Мулоқот бо паёми Президенти Ҷумҳурии Узбекистон Шавкат Мирзиёев ба вазирони мудофиаи кишварҳои Осиёи Марказӣ оғоз ёфт. Дар паём таъкид гардид, ки риштаҳои сулҳу субот байни халқҳои бародари мо тавассути ҳамбастагии мутақобил мустаҳкамтар мешаванд.

Дар нахустин мулоқоти вазирони мудофиаи кишварҳои Осиёи Марказӣ масъалаҳои таъмини амният дар минтақа, тавсеаи ҳамкории низомӣ ва низомӣ-техникӣ байни кишварҳо, инчунин бардоштани сатҳи ҳамоҳангсозии муборизаи муштарак бар зидди терроризми байналмилалӣ ва густариши робитаҳои мутақобили судманд мавриди баррасӣ ва мубодилаи афкор қарор гирифтанд.

Вазирони мудофиаи кишварҳои Осиёи Марказӣ ҳамзамон дар машқҳои муштараки минтақавии «Ваҳдат – 2025», ки дар машқгоҳи «Каттақурғон»-и Округи ҳарбии марказии Узбекистон бо иштироки воҳидҳои вазоратҳои мудофиаи Узбекистон, Тоҷикистон, Қазоқистон, Озарбойҷон ва Қирғизистон баргузор мегарданд, иштирок мекунанд.

АКС: Маркази матбуот ва иттилооти Вазорати мудофиаи Ҷумҳурии Тоҷикистон