Валиаҳди Шоҳигарии Негери-Сембилани Малайзия: «Таваҷҷуҳи Роҳбарияти олии Тоҷикистон ба татбиқи лоиҳаи НБО-и «Роғун» шоистаи таҳсин аст»

ДУШАНБЕ, 16.10.2025 /АМИТ «Ховар»/. 15 октябр Валиаҳди Шоҳигарии Негери-Сембилани Малайзия Тунку Алӣ Ризауддин ибни Туанку Муҳриз, ки барои иштирок дар Форуми байналмилалии сармоягузории «Душанбе Инвест — 2025» ба Тоҷикистон ташриф овардааст, бо ҷараёни корҳои сохтмонӣ дар Неругоҳи барқи обии «Роғун» шинос шуд. Дар ин хусус ба АМИТ «Ховар» аз маъмурияти неругоҳ хабар доданд.

Меҳмонон бо ҷараёни корҳои сохтмонӣ, иқтидори истеҳсолии неругоҳ ва нақши он дар таъмини истиқлолияти энергетикии Тоҷикистон шинос гардиданд.

Дар анҷоми шиносоӣ Валиаҳди Шоҳигарии Негери-Сембилани Малайзия дар китоби ифтихории Неругоҳи барқи обии «Роғун — Кохи Нур» соядаст гузошт. Ӯ таъкид намуд, ки Неругоҳи барқи обии «Роғун» намунаи равшани ормонҳои баланди Ҷумҳурии Тоҷикистон буда, таваҷҷуҳи роҳбарияти мамлакат ба татбиқи чунин лоиҳаи бузург шоистаи таҳсин аст.

Шиносоии Тунку Алӣ Ризауддин ибни Туанку Муҳриз бо бузургтарин иншооти энергетикии минтақа рамзи таҳкими ҳамкории дӯстона ва сармоягузорӣ байни Тоҷикистон ва Малайзия арзёбӣ мегардад.

АКС: Маъмурияти Неругоҳи барқи обии «Роғун»