Байни Ҳизби Халқии Демократии Тоҷикистон ва Ҳизби «Единая Россия» санади нави ҳамкорӣ ба имзо расид

ДУШАНБЕ, 17.11.2025 /АМИТ «Ховар»/. Вобаста ба вусъати ҳамкории гуногунҷабҳа байни Ҳизби Халқии Демократии Тоҷикистон ва Ҳизби «Единая Россия» санади нави ҳакморӣ ба имзо расид. Ин санади ҳамкорӣ аз ҷониби муовини якуми Раиси Ҳизби Халқии Демократии Тоҷикистон Маликшо Неъматзода ва муовини якуми Раиси Шурои Федератсияи Маҷлиси Федералии Федератсияи Русия — Котиби Шурои генералии Ҳизби «Единая Россия» Владимир Якушев имзо гардид. Дар ин хусус ба АМИТ «Ховар» аз Ҳизби Халқии Демократии Тоҷикистон хабар доданд.

Дар санади нави ҳамкорӣ дар баробари машваратҳои сиёсии байниҳизбӣ ва иштирок дар форумҳою конфронсҳои ҳамдигарӣ фаъолнокии ҳамкорӣ байни ташкилоти ҳизбии ҷавонон чорабиниҳои фарҳангӣ ва варзишӣ низ ба инобат гирифта шудаанд.

Ёдовар мешавем, ки ҳамкории мутақобили судманди Ҳизби Халқии Демократии Тоҷикистон ва Ҳизби умумирусиягии «Единая Россия» дар доираи Созишномае, ки аз соли 2017 байни ду ҳизби пешрави ҷомеаи Тоҷикистону Русия амал мекунад, идома дорад.

АКС: Ҳизби Халқии Демократии Тоҷикистон