Дар Душанбе конференсияи байналмилалӣ баргузор гардид

ДУШАНБЕ, 27.11.2025 /АМИТ «Ховар»/. Имрӯз зимни конференсияи байналмилалӣ дар Душанбе Стандарти ягонаи бизнес-таҳсилот дар Тоҷикистон муаррифӣ гардид, иттилоъ медиҳад АМИТ «Ховар».

Стандарти ягонаи бизнес-таҳсилот барои равнақ бахшидан ба рушди иқтисодиёт ва баланд бардоштани сатҳи некуаҳволии сокинон замина мегузорад.

Гуфта шуд, дар замони ҷаҳонишавӣ ва рушди техника талабот ба маҷмуи маҳсулот дигар мегардад. Барои дар бозори ҷаҳон муваффақ гардидан бояд ба стандартҳои низоми менеҷменти сифат диққати ҷиддӣ дода шавад.

Иброз гардид, ки дар шароити муосир давлат ҳамчун институти сиёсӣ дар низоми сиёсии ҷомеа барои рушду тараққиёти ҳаёти шарвандон нақши меҳварӣ дорад. Рушди босуботи иқтисодӣ ва дигар соҳаҳои ҳаёти ҷамъиятӣ аз низоми идоракунии давлатии самарабахш вобаста мебошад. Натиҷаи таҳия ва татбиқи стратегия ва барномаҳои дурусти давлатӣ аст, ки дар ҷаҳони муосир бархе давлатҳо бо суръати кайҳонӣ рушд менамоянд.

Бояд гуфт, ки дар Ҷумҳурии Тоҷикистон «Стратегияи миллии рушд барои давраи то соли 2030» таҳия ва қабул гардид. Дар он дар баробари пешбинии рушди соҳаҳои гуногуни хоҷагии халқ такмили низоми идоракунии давлатии Ҷумҳурии Тоҷикистон, ки муҳаррики асосии рушди мамлакат мебошад, низ яке аз бандҳои муҳим ба ҳисоб меравад. Стратегияи мазкур рушди дарозмуддати Ҷумҳурии Тоҷикистонро муайян намуда, барои амалӣ гардидани он тамоми мақомоти давлатӣ ва бахши хусусӣ ҷалб шудаанд.

Президенти Ҷумҳурии Тоҷикистон муҳтарам Эмомалӣ Раҳмон таъкид намуданд, ки «татбиқи чорабиниҳои «Стратегияи миллии рушди Ҷумҳурии Тоҷикистон барои давраи то соли 2030» ва «Барномаи миёнамуҳлати рушди Ҷумҳурии Тоҷикистон барои солҳои 2016-2020» барои расидан ба ҳадафи олии мо, яъне баланд бардоштани сатҳу сифати зиндагии мардуми мамлакат мусоидат намуд».

АКС: АМИТ «Ховар»