Рушди технологияҳои рақамӣ дар Тоҷикистон дар Форуми глобалии технологияҳои иттилоотӣ-коммуникатсонӣ дар Сеул баррасӣ шуд

ДУШАНБЕ, 14.11.2025 /АМИТ «Ховар»/. Ҷумҳурии Тоҷикистон барои татбиқи зеҳни сунъӣ бо мақсади рушди устувори мамлакат ва минтақа фаъолона иқдом менамояд. Ин нуктаро  Директори  Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо зимни суханронӣ дар Форуми глобалии технологияҳои иттилоотӣ-коммуникатсионӣ (11th Global ICT Leadership Forum) дар шаҳри Сеул иброз намуд.

АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад, ки форум бо иштироки намояндагони воломақоми кишварҳо, созмонҳои байналмилалӣ, муассисаҳои илмӣ-таҳқиқотӣ ва ширкатҳои пешсафи ҷаҳонӣ дар соҳаи технологияҳои иттилоотию коммуникатсионӣ баргузор гардид.

Хуршед Мирзо иброз дошт, ки бо ташаббуси Ҷумҳурии Тоҷикистон Қатъномаи Созмони Милали Муттаҳид оид ба зеҳни сунъӣ барои ноил шудан ба ҳадафҳои рушди устувор дар кишварҳои Осиёи Марказӣ қабул гардид. Дар доираи ин қатънома таъсиси Маркази минтақавии зеҳни сунъии кишварҳои Осиёи Марказӣ дар шаҳри Душанбе пешбинӣ карда шудааст.

Инчунин дар ин самт «Стратегияи рушди зеҳни сунъӣ дар Ҷумҳурии Тоҷикистон барои давраи то соли 2040» қабул гардидааст, ки татбиқи он ба рушди бахшҳои муҳими иқтисод, кишоварзӣ,   саноат, тандурустӣ, савдо ва молия мусоидат менамояд.

Тоҷикистон ба воситаи рушди инфрасохтори рақамӣ, татбиқи ҳукумати электронӣ, баланд бардоштани саводнокии рақамии аҳолӣ ва тавсеаи ҳамкории байналмилалӣ дар самти технологияи иттилоотӣ барои ноил шудан ба рушди устувор талош менамояд.

Дар доираи форум директори Агентӣ бо роҳбарони созмонҳо ва ширкатҳои пешсафи ҷаҳонӣ якчанд мулоқоти дуҷониба анҷом дод. Зимни он масъалаҳои тавсеаи ҳамкории судманд, ҷалби сармоя ба рушди соҳа ва татбиқи лоиҳаҳои муштарак дар Тоҷикистон баррасӣ гардиданд.

 АКС: Агентии инноватсия ва технологияҳои рақамии назди Президенти Ҷумҳурии Тоҷикистон