Тоҷикистон ва Амрико ҳамкориро дар соҳаи рақамикунонӣ тақвият медиҳанд

ДУШАНБЕ, 11.11.2025 /АМИТ «Ховар»/. Агентии инноватсия ва технологияҳои рақамии назди Президенти Ҷумҳурии Тоҷикистон ва ширкати амрикоии Nasdaq, Inc. Ёддошти тафоҳум ба имзо расониданд, иттилоъ медиҳад АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон.

Ин санад дар доираи баргузории ҳамоиши сатҳи баланди Тоҷикистон ва Амрико оид ба соҳибкорӣ дар Вашингтон ба тасвиб расид. Он ба рушди инфрасохтори молиявӣ ва технологии танзимкунандаи Тоҷикистон нигаронида шудааст. Созишнома навсозии низомҳои гузоришдиҳӣ, афзоиши шаффофияти бозор ва ҳамгироии қавитари Тоҷикистонро нисбат ба ҷомеаи молиявии ҷаҳонӣ пешбинӣ мекунад. Санад қадами муҳим барои тақвияти робитаҳои иқтисодӣ байни ду давлат, кушодани имконияои нав барои сармоягузорӣ, густариши тиҷорат ва мубодилаи технологияҳои пешрафта арзёбӣ мегардад.

Директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо ва мудири калони Бюрои таҳдидҳои пайдошавандаи Департаменти давлатии Амрико Энни Ву ҳамчунин имконоти зеҳни сунъиро дар таъмини рушди устувори иқтисодӣ дар Осиёи Марказӣ ва Иёлоти Муттаҳида дар соҳаи рақамӣ баррасӣ намуданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон