Дар шаҳру ноҳияҳои вилояти Суғд беш аз 2 ҳазор километр роҳ таъмиру навсозӣ карда шуд

ДУШАНБЕ, 10.12.2025 /АМИТ «Ховар»/. Ба истиқболи 35 — солагии Истиқлоли давлатии Ҷумҳурии Тоҷикистон соли 2025 дар шаҳру ноҳияҳои вилояти Суғд беш аз 2 ҳазор километр роҳ таъмиру навсозӣ гардид.

Тавре  ба АМИТ «Ховар» аз хадамоти матбуоти Раиси вилояти Суғд иттилоъ доданд, соли 2025 дар баробари иҷрои дигар тадбирҳои муҳими созандагӣ раванди мумфарш намудани роҳҳои мошингард дар 18 шаҳру ноҳияи вилоят вусъат ёфт.

Аз ҷониби  аҳолӣ ва шахсони саховатпеша беш аз 750 километр роҳҳои дорои аҳамияти маҳаллӣ пурра мумфарш карда шуданд. Ин нишондиҳанда нисбат ба соли 2024   100 километр зиёд аст.

Дар мумфаршкунии роҳҳо соҳибкорон ва аҳолии шаҳру ноҳияҳои Хуҷанд, Конибодом, Ҷаббор Расулов, Ашт, Спитамен, Панҷакент,  Исфара ва ноҳияи Бобоҷон Ғафуров пешсафанд.

Ин тадбири муҳим дар вилоят асосан аз ҷониби нафароне амалӣ гардид, ки қаблан нияти сафари ҳаҷ доштанд. Аммо бо дарки он, ки саҳмгузорӣ дар ободонии диёр савоби бештар дорад, садҳо нафар соконони худогоҳу хештаншинос ба хотири беҳдошти рӯзгори мардум корҳои созандагию бунёдкориро амалӣ менамоянд.

АКС: Хадамоти матбуоти Раиси вилояти Суғд