Файзалӣ Идизода бо Раиси Маҷлиси Бузурги Миллии Ҷумҳурии Туркия Нумон Куртулмуш мулоқот намуд

ДУШАНБЕ, 02.12.2025 /АМИТ «Ховар»/. 2 декабр Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Раиси Маҷлиси Бузурги Миллии Ҷумҳурии Туркия Нумон Куртулмуш мулоқот намуд. Дар ин хусус ба АМИТ «Ховар» аз Маҷлиси намояндагон иттилоъ доданд.

Файзалӣ Идизода иброз намуд, ки Туркия дар қатори аввалин кишварҳо Ҷумҳурии Тоҷикистонро ҳамчун давлати соҳибихтиёр эътироф намуда, робитаҳои дипломатӣ барқарор намуд. Имрӯзҳо ҳамкории гуногунҷанбаи Тоҷикистон ва Туркия бо иқдоми созандаи роҳбарияти олии давлатҳоямон- Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Туркия муҳтарам Реҷеп Тайип Эрдоган идома ёфта, ҷанбаҳои гуногуни ҳамкории барои ҷонибҳо судмандро фаро мегиранд.

Дар натиҷаи саъю талошҳои муштарак то имрӯз бо мақсади такмили заминаи ҳуқуқии муносибатҳои дӯстӣ ва ҳамкории ду давлат зиёда аз 80 санади ҳамкорӣ ба имзо расидааст. Ин санадҳо соҳаҳои сиёсӣ, иқтисодӣ, тиҷорату сармоягузорӣ, маорифу фарҳанг, иҷтимоию гуманитарӣ ва дигар бахшҳои муҳимро фаро мегиранд.

Мавқеи Тоҷикистон ва Туркия нисбат ба масъалаҳои умдаи байналмилалӣ ва минтақавӣ низ ҳамсон ва ба ҳам наздик буда, кишварҳои мо дар чаҳорчӯби созмонҳои байналмилалӣ ва минтақавӣ, аз қабили Созмони Милали Муттаҳид, Созмони ҳамкории иқтисодӣ, Созмони ҳамкории исломӣ ва дигар сохторҳою иттиҳодияҳои ҳамкории бисёрҷониба бо назардошти манфиатҳои тарафайн робитаҳои шарикии босамар доранд.

Яке аз самтҳои калидии ҳамкории байналмилалии Маҷлиси намояндагон робитаҳои байнипарламентӣ бо мақомоти қонунгузори кишварҳои хориҷӣ, аз ҷумла Ҷумҳурии Туркия мебошад. Рушд ва тавсеаи ҳамкорӣ бо Маҷлиси Бузурги Миллии Ҷумҳурии Туркия дар фаъолияти байналмилалии Парламенти Тоҷикистон мавқеи хосса дорад.

Гурӯҳи дӯстии байнипарламентии даъвати нави Маҷлиси намояндагон бо Маҷлиси Бузурги Миллии Ҷумҳурии Туркия таъсис дода шуда, ҳоло муколамаҳо идома доранд.

“Маҷлиси намояндагон дар қабули қонунҳо, тасвиби шартномаҳои байналмилалӣ таҷрибаи бой дорад. Мо омодагии худро барои тақвият додани ҳамкории байнипарламентӣ дар доираи санадҳои ҳамкории ду давлат иброз медорем. Ҳамзамон хоҳони ба роҳ мондани ҳамкории минбаъда байни кумитаҳо ва фраксияҳои сиёсии парламентҳои Ҷумҳурии Тоҷикистон ва Ҷумҳурии Туркия мебошем”, — иброз намуд Файзалӣ Идизода.

АКС: Маҷлиси намояндагони Маҷлиси Олии Ҷумҳурии Тоҷикистон