Ҳамкории Тоҷикистон ва Эрон дар самтҳои афзалиятнок рушд меёбад

ДУШАНБЕ, 04.12.2025 /АМИТ «Ховар»/. 3 декабр Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода бо Сафири Фавқулода ва Мухтори Ҷумҳурии Исломии Эрон Алиризо Ҳақиқиён вохӯрӣ намуд.

Тавре аз Вазорати рушди иқтисод ва савдои Ҷумҳурии Тоҷикистон ба АМИТ «Ховар» хабар доданд, зимни вохӯрӣ ҷонибҳо масъалаҳои густариши ҳамкории дуҷониба дар самтҳои афзалиятнок, аз ҷумла ҷалби сармоягузорӣ, рушди энергетика ва саноат, инфрасохтори нақлиётӣ ва логистикӣ, содагардонии низоми рафтуомад, афзоиши парвозҳои мустақим, тавсеаи ҳамкорӣ дар соҳаи кишоварзӣ, инчунин тақвияти амнияти озуқавориро баррасӣ намуданд.

Таъкид гардид, ки Тоҷикистон ва Эрон барои рушду таҳкими робитаҳои иқтисодӣ, татбиқи лоиҳаҳои муштарак ва баланд бардоштани иқтидори савдо байни ду давлат омодагии комил доранд.

АКС: Вазорати рушди иқтисод ва савдои Ҷумҳурии Тоҷикистон