Мутахассиси шинохтаи футболи тоҷик Шариф Назаров дар 80-солагӣ аз олам даргузашт

ДУШАНБЕ, 31.12.2025 /АМИТ «Ховар»/. Мутахассиси шинохтаи футболи тоҷик, Мураббии шоистаи Иттиҳоди Шуравӣ Шариф Назаров дар 80-солагӣ аз олам даргузашт. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Шариф Назаров 23 феврали соли 1946 таваллуд шудааст. Шариф Назаров аз маъмурӣ сар карда, то ба вазифаи сармураббӣ расид. Ӯ бо бисёр мураббиёне, ки дар муваффақияти дастаи «Помир»-и Душанбе саҳми назаррас гузоштаанд, ҳамроҳ фаъолият намуд.

Таҳти роҳбарии Шариф Назаров дастаи «Помир»-и Душанбе соли 1988 дар Лигаи якум ғолиб омада, ба Лигаи олии Иттиҳоди Шуравӣ роҳ ёфт.

Ҳамчун мураббӣ Шариф Назаров ҷоизаҳои зиёде ба даст овард. Ӯ қаҳрамони чандинкарата ва барандаи Ҷоми Тоҷикистон аст. Ба ҳайси мураббии дастаи миллии Тоҷикистон ӯ Ҷоми даъвати КФО-2006-ро соҳиб шудааст.

АКС: Федератсияи футболи Тоҷикистон