НИШАСТИ МАТБУОТӢ. Соли 2025 дар Тоҷикистон беш аз 3 миллион бех ниҳоли дарахтони ҳамешасабзу ороишӣ шинонида шуд
ДУШАНБЕ, 29.01.2026/АМИТ «Ховар»/. Дар доираи «Барномаи давлатии кабудизоркунии Ҷумҳурии Тоҷикистон барои давраи то соли 2040» дар Тоҷикистон соли 2025 беш аз 3 миллион бех ниҳоли дарахтони ҳамешасабз, сояафкану ороишӣ ва мевадиҳанда шинонида шуд, ки 107 фоизи нақшаро ташкил медиҳад. Дар ин хусус Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода 29 январ дар нишасти матбуотӣ ба хабарнигорон иттилоъ дод.
Гуфта шуд, ки новобаста ба гармии тоқатфарсои тобистони соли 2025 аз маҷмуи умумии ниҳоли дарахтони шинонида қариб 70 фоизаш нашъунамо ва сабзиши хуб дорад.
Баҳодур Шерализода гуфт, ки дар самти корҳои ободонию созандагӣ, хусусан ниҳолшинонӣ дар доираи дастуру супоришҳои Ҳукумати Ҷумҳурии Тоҷикистон кумита пайваста тадбирҳои зарурӣ меандешад. Ҳамчунин барои ташкили ниҳолхонаҳо ва хоҷагиҳои ниҳолпарварӣ дар маҷмуъ 63 гектар қитъаи замин дар ҳудуди шаҳру ноҳияҳои ҷумҳурӣ ва заминҳои ҳудудҳои табиии махсус муҳофизатшаванда ҷудо ва ба мақомоти ҳифзи муҳити зист дар маҳалҳо вобаста карда шудааст. Қитъаҳои замин таворабандӣ гардида, дар онҳо ба миқдори 216 ҳазору 125 бех қаламча-кӯчати навниҳолони дарахту буттаҳои ҳамешасабзу ороишӣ ва сояафкану мевадиҳанда шинонида шудааст. Инчунин ба миқдори 1 ҳазору 818 килограмм тухмии ниҳоли дарахтон кишт карда шудааст.
26 сентябри соли 2025 Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни сафари корӣ ба шаҳри Ваҳдат дар деҳоти Раҷаб Исмоилов бо нашъунамои дарахтони хоҷагии ниҳолпарварии назди Кумитаи ҳифзи муҳити зисти назди Ҳукумати Ҷумҳурии Тоҷикистон шинос шуданд. Дар ин хоҷагӣ бо мақсади амалишавии «Барномаи давлатии кабудизоркунӣ барои то давраи соли 2040» дар 5 гектар беш аз 25 000 бех ниҳолу дарахтони гуногуни ҳамешасабз ва сояафкану ороишӣ парвариш карда мешаванд.
Инчунин моҳи декабри соли 2025 бо иштироки роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Хатлон дар Ҷамоати деҳоти Ғаллаобод ва шаҳраки Хуррамшаҳри ноҳияи Хуросон зиёда аз 1000 бех дарахтони ҳамешасабзу ороишӣ шинонида шуданд.
Бояд гуфт, ки Ҳукумати Тоҷикистон тасмим гирифтааст, ки дар доираи татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» дар мамлакат беш аз ду миллиард ниҳоли дарахтони ҳамешасазабзу ороишӣ ва сояафкану мевадиҳанда шинонида, Тоҷикистонро ба «кишвари сабз» табдил диҳад.
Марзия САИДЗОДА,
АМИТ «Ховар»
АКС: АМИТ «Ховар»
«Тоҷик Эйр» тавассути лизинги молиявӣ ду ҳавопаймои «Airbus» харидорӣ менамояд
Дар Тоҷикистон 95,1 фоизи борҳо ва 99,8 фоизи мусофирон тавассути нақлиёти автомобилӣ ҳамлу нақл мешаванд
НИШАСТИ МАТБУОТӢ. Роҳи оҳани Тоҷикистон барои содироти молу маҳсулот то 80 фоиз сабукиҳо пешниҳод намудааст
НИШАСТИ МАТБУОТӢ. Корҳои сохтмонӣ дар Неругоҳи барқи обии «Роғун» қариб 60 дарсад ба анҷом расидаанд
НИШАСТИ МАТБУОТӢ. Соли 2026 ҳаққи хизмати обрасонӣ пурра тавассути низоми биллингӣ пардохт мегардад
Донишҷӯёни 56 филиали кафедраҳои Донишгоҳи аграрии Тоҷикистон дар корхонаҳои пешқадами соҳавӣ фаъолият доранд
НИШАСТИ МАТБУОТӢ. Ҳаҷми умумии истеҳсоли маҳсулоти кишоварзӣ дар Тоҷикистон 9,5 фоиз афзоиш ёфтааст
Исфандиёри Саъдулло: «Барои беҳтар намудани хизматрасонии алоқа 1850 истгоҳи базавӣ насб карда мешавад»
Агентии авиатсияи гражданӣ: Соли 2025 аз Тоҷикистон ба 16 кишвари хориҷӣ парвозҳои ҳавоӣ ташкил карда шуд
НИШАСТИ МАТБУОТӢ. Дар Вазорати нақлиёти Тоҷикистон 11 лоиҳаи сармоягузорӣ амалӣ мегардад
«ШОҲИН ЭЙР» ДАР КАНОРИ АБРҲО. Дар Тоҷикистон ширкати нави ҳавопаймоии хусусӣ ба фаъолият шуруъ намуд
Агентии авиатсияи гражданӣ: Соли 2025 Фурудгоҳи байналмилалии Душанбе ба зиёда аз 8 ҳазору 800 хатсайр хизмат расонид
