Дар Душанбе курсҳои омӯзишӣ барои мураббии дарвозабонҳо ба анҷом расид

ДУШАНБЕ, 14.02.2026 /АМИТ «Ховар»/. Курсҳои панҷрӯза барои мураббии дарвозабонҳо, ки аз ҷониби раёсати техникии Федератсияи футболи Тоҷикистон ташкил гардид, ба анҷом расиданд.

Тавре ба АМИТ «Ховар» аз Федератсияи футболи Тоҷикистон хабар доданд, машғулиятҳо аз 9 то 13 феврал дар шаҳри Душанбе баргузор шуданд.

Дастурдиҳандаҳои он мураббии дарвозабонони тими миллии Тоҷикистон Алишер Тӯйчиев, мутахассисони Федератсияи футболи Тоҷикистон Салоҳиддин Ғафуров ва Субҳон Хоҷамов буданд.

Чунин курсҳо барои такмили маҳорати дарвозабонҳо муҳиманд. Барнома дарсҳои назариявӣ ва амалиро дар бар мегирифт, ки дар онҳо иштирокчиён равишҳои муосири ташкили раванди тамрин, хусусиятҳои омодагии ҷисмонӣ ва равонии дарвозабонҳо ва усулҳои таҳлили вазъиятҳои бозиро омӯхтанд.

АКС: Федератсияи футболи Тоҷикистон