Маҷмуаи ашъори «Каманди зулф»-и Шоири халқии Тоҷикистон дар нашриёти «Орван»-и Теҳрон ба табъ расид
ДУШАНБЕ, 22.02.2026 /АМИТ «Ховар»/. Нашриёти «Орван»-и Теҳрон маҷмуаи ашъори Шоири халқии Тоҷикистон Зулфия Атоиро таҳти унвони «Каманди зулф» бо ҳуруфоти форсӣ аз чоп баровард, иттилоъ медиҳад АМИТ «Ховар» бо истинод ба Муассисаи фарҳангии Созмони ҳамкории иқтисодӣ.
«Каманди зулф» бо тавсияи Вазорати фарҳанги Ҷумҳурии Тоҷикистон аз ҷониби Муассисаи фарҳангии Созмони ҳамкории иқтисодӣ ба табъ расида, дар он шеърҳои эҷоднамудаи Шоири халқии Тоҷикистон Зулфия Атоӣ, ки ҷаҳони зани муосири тоҷикро бозгӯйӣ менамоянд, гирд оварда шудаанд. Ашъори маҷмуа фарогири мавзуъҳое, ба мисли Ватан, зан, ишқу муҳаббат ва зебоӣ мебошанд.
Маҷмуаи «Каманди зулф» бо сухани муқаддимавии Раиси Муассисаи фарҳангии Созмони ҳамкории иқтисодӣ доктор Муҳаммад Ҳасан оғоз гардида, зимни он чунин гуфта шудааст: «Шеъри Зулфия Атоӣ- Шоири халқии Тоҷикистон садои занест, ки дилро дар оинаи ҷаҳон нигариста ва аз захмҳову шукуфаҳо ҷодуи тоза офаридааст. Вожагони ӯ чун парандае бар фарози солҳо пар мекушоянд; гоҳе насими ноз аст, гоҳе оташи фарёд ва ҳамеша ҳақиқатест, ки аз умқи ҷон бармеояд. Хондани ин дафтар қадам задан дар роҳравест, ки дар он ҳар байт чароғе рӯшан мекунад, ҳар шеър дасте бар шонаи инсон мениҳад ва ҳар калима занеро, ки дар ҷаҳон истодааст, бо қомати нур тасвир месозад».
Дар ин маҷмуа Зулфия Атоӣ бо забони равшан ва баёни самимӣ умедҳои мардумро дар қолаби шеърҳое саршор аз тасвир ва эҳсос бозтоб додааст. Ҳузури пурранги мафҳуми «зан» ҳамчун меҳвари ҳувият ва ишқ аз вижагиҳои барҷастаи ин китоб мебошад.
Доктор Алӣ Муҳаммадии Хуросонӣ-муҳаққиқи тоҷик дар навиштаи таҳлилие дар ин китоб кӯшидааст тасвири ҷомеъ аз масири шеърии ин шоир ва ҷойгоҳи ӯро дар шеъри муосири тоҷик нишон диҳад.
Нашри «Каманди зулф» қадами тозае дар таҳкими пайвандҳои адабӣ ва фарҳангӣ байни мардумони ҳавзаи кишварҳои Созмони ҳамкории иқтисодӣ мебошад.
Муассисаи фарҳангии Созмони ҳамкории иқтисодӣ тасмим гирифтааст, ки дар оянда маросими рӯнамои маҷмуаи «Каманди зулф»-ро баргузор намояд.
Марзия САИДЗОДА,
АМИТ «Ховар»
АКС аз манбаъҳои боз
Имрӯз дар шаҳри Душанбе Рӯзи фарҳанги ноҳияи Рӯдакӣ доир шуд
РӮЗИ ФАРҲАНГИ НОҲИЯИ ҚУБОДИЁН. Барномаҳои рангини фарҳангиву фароғатӣ таваҷҷуҳи иштирокчиёнро ба худ ҷалб намуд
Китоби «Китобномаи шарҳиҳолӣ»-и Сипеҳр Ҳасанзод рӯнамоӣ гардид
Ҷаласаи комиссияи Озмуни ҷумҳуриявии «Тоҷикистон — Ватани азизи ман» баргузор гардид
Намояндаи Ҳизби Коммунистии Чин дар Осорхонаи миллии Тоҷикистон бо таъриху фарҳанги тоҷикон шинос шуд
Узви Раёсати Ҳизби «Ени Озарбойҷон» дар Осорхонаи миллӣ бо тамаддуни қадимаи тоҷикон шинос гардид
Дар Теҳрон китоби «Каманди зулф»-и Зулфия Атоӣ рӯнамоӣ гардид
РОБИАИ БАЛХӢ – НАХУСТБОНУИ СОҲИБДЕВОНИ АДАБИЁТИ ТОҶИКУ ФОРС. Дар Душанбе конференсияи байналмилалӣ баргузор шуд
Бахшида ба 35-солагии Истиқлолияти давлатӣ китоби «Хуттали Қадим» аз чоп баромад
Бахшида ба фаъолияти соҳаи метрологияи тоҷик Конференсияи байналмилалии илмӣ-назариявӣ баргузор гардид
Ҳунармандони тоҷик дар Фестивали 4-уми байналмилалии театрҳои лӯхтак иштирок намуданд
Дар Душанбе Рӯзҳои фарҳанги шаҳри Турсунзода ва ноҳияҳои Қубодиён, Рӯдакӣ, Спитамен, Шаҳринав ва Панҷ баргузор мешаванд
