Соли 2025 дар гармхонаҳои Тоҷикистон беш аз 80 ҳазор тонна маҳсулоти кишоварзӣ истеҳсол гардид

ДУШАНБЕ, 10.02.2026 /АМИТ «Ховар»/. Соли 2025 барои таъмини аҳолӣ бо сабзавоти тару тоза аз гармхонаҳои доимамалкунандаю мавсимӣ 80 206 тонна сабзавот, аз ҷумла 26 695 тонна помидор, 23 018 тонна бодиринг ва 30 492 тонна дигар намуди сабзавот истеҳсол ва ба бозори истеъмолии мамлакат пешниҳод гардид. Дар ин хусус аз Вазорати кишоварзии Ҷумҳурии Тоҷикистон иттилоъ доданд.

Дар мамлакат 996 гармхонаи доимамалкунанда фаъолият мекунад, ки замини он 178 гектарро ташкил медиҳад.

Солҳои охир таваҷҷуҳ ба рӯёнидани сабзавоти тару тоза ва сабзаҷот дар гармхонаҳо меафзояд. Фаъолияти босамари гармхонаҳо аст, ки дар рӯзҳои зимистон бозори истеъмолӣ аз ҷониби кишоварзони мамлакат бо сабзавоти тару тоза таъмин карда мешавад.

Ҳукумати мамлакат аҳамияти иқтисодӣ ва иҷтимоии ин масъаларо ба инобат гирифта, ба хотири васеъ намудани майдони истеҳсоли маҳсулоти кишоварзӣ тавассути гармхонаҳо тадбирҳои муассир меандешад.

АКС: АМИТ «Ховар»