Ҷашни Наврӯз дар Ҳисор бо иштироки меҳмонон аз Ҷумҳурии Узбекистон таҷлил гардид

ДУШАНБЕ, 26.03.2026. /АМИТ «Ховар»/. Бо шарофати талошҳои Президенти Ҷумҳурии Тоҷикистон муҳтарам Эмомалӣ Раҳмон имрӯзҳо суннату ойинҳои неки миллӣ, аз ҷумла ҷашни Наврӯз аз нав эҳё гардида, ин ҷашни аҷдодӣ дар саросари ҷумҳурӣ бо шукуҳу шаҳомати хоса таҷлил мегардад. Наврӯзи ҷаҳонӣ ба яке аз рамзҳои муҳими фарҳанг ва ваҳдати миллӣ табдил ёфтааст. Чунин гуфта шуд дар маросими таҷлили Ҷашни байналмилалии Наврӯз, ки дар шаҳри Ҳисор бо иштироки меҳмонони хориҷӣ баргузор гардид.

АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад, ки дар тантанаҳои ҷашнӣ муовини Сарвазири мамлакат Дилрабо Мансурӣ, муовини якуми раиси Ҳизби Халқи Демократии Тоҷикистон Маликшо Неъматзода, вакили Маҷлиси намояндагони Маҷлиси Олии Ҷумҳурии Тоҷикистон Сурайё Дӯстмуродзода, меҳмонон аз Кумитаи марказӣ ва кумитаҳои иҷроияи ҲХДТ дар вилоят ва шаҳру ноҳияҳои ҷумҳурӣ, ҳайати намояндагони ноҳияи Деҳнави вилояти Сурхондарёи Ҷумҳурии Узбекистон иштирок намуданд.

Дилрабо Мансурӣ меҳмонону сокинони шаҳрро аз номи Ҳукумати Ҷумҳурии Тоҷикистон бо фарорасии Наврӯзи оламафрӯз табрик намуда, таъкид кард, ки ҷашни Наврӯз мероси фарҳангии миллати тоҷик буда, аз қадимулайём ҳамчун рамзи оғози зиндагии нав, эҳёи табиат ва орзуву умедҳои неки инсонӣ таҷлил мегардад. Ин ҷашни бостонӣ мардумро ба меҳру муҳаббат, ҳамдилӣ, ваҳдату ҳамбастагӣ ва созандагиву бунёдкорӣ раҳнамун месозад.

Сипас бо иштироки ҳунармандони маъруфи ҷумҳурӣ ва Филармонияи халқии ба номи Тоҷиддин Муҳиддинови шаҳри Ҳисор барномаи идонаи консертӣ, ки тараннумгари баҳору наврӯз, зебоиҳои табиат буд, пешкаши меҳмонон ва сокинони шаҳр гардонида шуд.

АКС: Мақомоти иҷроияи ҳокимияти давлатии шаҳри Ҳисор