Байни Тоҷикистон ва Узбекистон нақшаи чорабиниҳо оид ба татбиқи Созишномаи ҳамкорӣ дар соҳаи технология ва инноватсия барои солҳои 2026-2028 ба имзо расид

ДУШАНБЕ, 28.03.2026. /АМИТ «Ховар»/. Нақшаи чорабиниҳо оид ба татбиқи Созишномаи ҳамкорӣ байни Вазорати саноат ва технологияҳои нави Ҷумҳурии Тоҷикистон ва Вазорати сармоягузорӣ, саноат ва савдои Ҷумҳурии Узбекистон дар соҳаи технология ва инноватсия барои солҳои 2026-2028 ба имзо расид. Санади мазкур 26 марти соли равон дар маросими имзои санадҳои нави ҳамкорӣ дар ҳузури Сарони давлатҳои Тоҷикистон ва Узбекистон ба имзо расид.

Зимни изҳороти матбуотӣ аз рӯи натиҷаҳои музокироти сатҳи олии Тоҷикистон ва Узбекистон, Президенти Тоҷикистон муҳтарам Эмомалӣ Раҳмон иброз доштанд, ки «мо ҷараёни устувори афзоиши тиҷорати дуҷонибаро баланд арзёбӣ кардем. Аз рӯи натиҷаҳои соли гузашта афзоиши гардиши мол тақрибан 30 фоизро ташкил дод.Мо қабули фаврии Барномаи зиёд намудани ҳаҷми гардиши мол то 2 миллиард доллари амрикоиро то соли 2030-ро истиқбол менамоем. Аз пешниҳоди расидан ба ин нишондиҳанда то соли 2028 ҷонибдорӣ менамоем. Ҳамкории сармоягузорӣ фаъолона пеш мераванд».

Иттилоъ дода шуд, ки айни замон дар қаламрави Ҷумҳурии Узбекистон зиёда аз чорсад корхона бо сармояи Тоҷикистон фаъолият дорад. Ҳамзамон, дар Тоҷикистон зиёда аз яксаду сӣ корхона бо сармояи Узбекистон фаъолият дорад.

«Ин аз сатҳи баланди фаъолияти тиҷоратии соҳибкорони мо дарак медиҳад Мо ба густариши минбаъдаи иштироки доираҳои тиҷоратии Узбекистон дар татбиқи лоиҳаҳои муштарак дар Тоҷикистон умед дорем», — тазаккур доданд Пешвои миллат.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»