Чеварони хушсалиқаи шаҳри Кӯлоб барои Осорхонаи миллӣ калонтарин гулдӯзии мунаққашро омода намуданд
ДУШАНБЕ, 16.03.2026. /АМИТ «Ховар»/. Дар ифтитоҳи намоиши анъанавӣ дар Осорхонаи миллии Тоҷикистон таҳти унвони «Аз Наврӯз то Наврӯз» дар байни навъҳои гуногуни сӯзаниҳо ва ҷомаву куртаҳои чакан, ки инъикосгари таъриху фарҳанги қадимаи халқи тоҷик мебошанд, чодар — гулдӯзии чакани мунаққаш, ки ба андозаи 6х6 метр омода карда шудааст, таваҷҷуҳи тамошобинонро бештар ҷалб намуд.
Тавре ба АМИТ «Ховар» аз Осорхонаи милии Тоҷикистон хабар доданд, ин чодари гулдӯзӣ аз ҷониби ҳунарманд Раҷабмоҳ Ғафурова ва 6 нафар чеварони хушсалиқаи шаҳри Кӯлоб дар муддати 6 моҳ ба андозаи 6х6 метр омода карда шудааст.
Раҷабмоҳ Ғафурова иброз дошт, ки дар тӯли фаъолияти ҳунармандияш зиёда аз 60 адад чодари гулдӯзӣ офаридааст, ки дар байни онҳо ин гулдӯзии мунаққаш аз ҷиҳати ҳаҷм калонтарин аст.
«Имрӯзҳо ба тарбияи шогирдон машғул шуда, ба занону духтарони бекор ҳунари чакандӯзиро меомӯзам. Ҳунари омӯхтаи онҳо барои даромади молӣ овардан ба оилаашон мусоидат менамояд. Бисёре аз шогирдонам чеварони моҳир гаштаанду фармоиш гирифта, барои занону духтарон куртаи чакан медӯзанд»,-мегӯяд Раҷабмоҳ Ғафурова.
Ёдовар мешавем, ки соли 2018 Идораи илму фарҳанги Созмони Милали Муттаҳид – ЮНЕСКО дар иҷлосияи солонаи худ, ки дар шаҳри Маврикий баргузор гардид, яке аз навъҳои гулдӯзии қадимӣ ва рушдёбандаи тоҷикон — «чакан» — ро ба Рӯйхати мероси фарҳангии ғайримоддии башарият шомил кард.
Гулдӯзии (кашидадӯзии) тоҷикон ҳунари нафиси қадима буда, яке аз шаклҳои санъати амалӣ –ороишии мардумӣ ва қисми муҳими мероси фарҳангии умумибашарӣ маҳсуб меёбад. Аз ин ҷост, ки намунаҳои волои гулдӯзии тоҷикиро дар аксар осорхонаҳои Тоҷикистон ва осорхонаҳои машҳури олам дидан мумкин аст.
Чакан дар сомонаи ЮНЕСКО чунин муаррифӣ карда шудааст: «Чакан як навъи гулдӯзии миллӣ дар матоъҳои пахтагӣ ва абрешимӣ аст, ки бештар дар байни занону духтарони тоҷик ривоҷ ёфтааст. Дар вилояти Хатлони Тоҷикистон чакан як ҷузъи муҳими либоси арӯсу домод ба шумор меравад. Дар инҷо домодҳо тоқии худро бо гулдӯзиҳои чакан оро медиҳанд ва занону духтарон дар рӯзҳои тӯй ва иду маросим куртаву поҷомаи чакан ба тан мекунанд. Санъати чакан аз насл ба насл бо шеваи устод-шогирд ба мерос мондааст».
АКС: Осорхонаи миллии Тоҷикистон
Дар Донишгоҳи технологии Тоҷикистон даври якуми Озмуни ҷумҳуриявии «Донандаи беҳтарини асарҳои Пешвои миллат» доир гардид
Бахшида ба 35-солагии робитаҳои бародаршаҳрӣ байни Душанбе ва Санкт-Петербург дар Осорхонаи миллӣ намоиши аксҳо ифтитоҳ ёфт
Аъзои ҳайати шаҳри Санкт-Петербург дар Осорхонаи миллӣ бо давраҳои пурифтихори таъриху фарҳанги бостонии тоҷикон шинос шуданд
Дабири кулли САҲА дар Осорхонаи миллии Тоҷикистон бо тамаддуни миллати тоҷик шинос шуд
Рушди ҳамкории фарҳангии Тоҷикистону Қирғизистон баррасӣ шуд
«…МОДАР ЯКТОСТ, ТОҶИКИСТОН ЯКТОСТ…». Ба зодрӯзи Шоири халқии Тоҷикистон устод Лоиқ Шералӣ 85 сол пур шуд
«МЕАНДЕШАМ, ПАС ҲАСТАМ». Таҳти ин унвон намоиши осори Рассоми халқии Тоҷикистон Суҳроб Қурбонов ташкил карда мешавад
Дар Бишкек маросими тантанавии ифтитоҳи Рӯзҳои фарҳанги Ҷумҳурии Тоҷикистон баргузор гардид
Дар Донишкадаи санъати тасвирӣ ва дизайни Тоҷикистон даврҳои омӯзишии «Эбру», 3D ва колиграфия ифтитоҳ шуданд
«ЗЕБОИИ ТОҶИКИСТОН–МЕРОС БАРОИ ОЯНДА». Дар Бишкек намоишгоҳи санъати тасвирии Тоҷикистон ифтитоҳ ёфт
Дар Хуҷанд даври шаҳрии Озмуни ҷумҳуриявии «Тоҷикистон— Ватани азизи ман» оғоз шуд
Рӯзҳои кинои Ҷумҳурии Тоҷикистон дар Ҷумҳурии Қирғизистон ифтитоҳ гардиданд
