Дар Душанбе оид ба дастгирии экосистемаи стартапҳо дар Тоҷикистон ҳамоиш баргузор гардид

ДУШАНБЕ, 06.03.2026 /АМИТ «Ховар»/. Вазъи кунунии экосистемаи стартапӣ, мушкилоти мавҷуда ва тадбирҳои зарурӣ барои рушди минбаъдаи соҳа дар ҳамоише, ки бо ибтикори Агентии инноватсия ва технологияҳои рақамии назди Президенти Ҷумҳурии Тоҷикистон дар ҳамкорӣ бо Бонки Аврупоии Таҷдид ва Рушд дар бинои IT-Park баргузор шуд, баррасӣ гардид.

АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад, ки дар ҳамоиш, ки дар доираи лоиҳаи «Star Venture» доир шуд, намояндагони бахши давлатӣ ва хусусӣ, шарикони рушд ва дигар иштирокчиёни фаъоли соҳаи стартап иштирок намуданд.

Гуфта шуд, ки дар се соли охир экосистемаи стартапӣ дар мамлакат ба таври назаррас рушд ёфтааст. Яке аз қадамҳои муҳим дар ин раванд таъсис ва фаъолияти IT-Park арзёбӣ гардид, ки ҳамчун платформаи мусоид барои рушди ташаббусҳои инноватсионӣ хизмат менамояд.

Дар ҳамоиш зарурати таҳкими заминаи ҳуқуқӣ, таъсиси платформаҳои махсус барои омода ва рушд додани стартапҳо, инчунин дастгирии ҷавонон ҳамчун неруи асосии пешбарандаи соҳа самтҳои афзалиятноки рушди минбаъда муайян карда шуданд.

АКС: Агентии инноватсия ва технологияҳои рақамӣ