Имрӯз Форуми сеюми ректорони муассисаҳои таҳсилоти олии Тоҷикистон ва Узбекистон баргузор мегардад

ДУШАНБЕ, 13.03.2026 /АМИТ «Ховар»/. Имрӯз, соати 10:00 дар Донишгоҳи давлатии омӯзгории Тоҷикистон ба номи Садриддин Айнӣ Форуми сеюми ректорони муассисаҳои таҳсилоти олии Ҷумҳурии Тоҷикистон ва Ҷумҳурии Узбекистон таҳти унвони «Маорифи олӣ ва илми Тоҷикистон ва Узбекистон: уфуқҳои нави ҳамкорӣ» баргузор мегардад. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Форум бо ташаббуси Вазорати маориф ва илми Ҷумҳурии Тоҷикистон ва Вазорати таҳсилоти олӣ, илм ва инноватсияҳои Ҷумҳурии Узбекистон доир шуда, чун майдони муҳимми муколамаи илмӣ ва академӣ барои густариши ҳамкорӣ байни донишгоҳҳои ду давлат арзёбӣ мегардад.

Форум бо ҳадафи таҳкими ҳамкории байнидавлатӣ дар соҳаи маорифи олӣ ва илм, рушди робитаҳои академӣ, густариши табодули таҷриба ва ташаккули фазои ягонаи таълимӣ байни муассисаҳои таҳсилоти олии Тоҷикистон ва Узбекистон баргузор мегардад.

АКС: Маркази матбуоти Вазорати маориф ва илми Ҷумҳурии Тоҷикистон