«НАВРӮЗ — ПАЙВАНДГАРИ ҚАЛБҲО». Дар шаҳри Бӯстон тантанаҳои ҷашни Наврӯз доир шуданд

ДУШАНБЕ, 25.03.2026 /АМИТ «Ховар»/. Дар шаҳри Бӯстони вилояти Суғд  ҷашни куҳану ҳамешаҷавони Наврӯз бо пазироии руҳияи замони нав, ки  мавриди эътирофи ҷаҳониён қарор гирифтааст, таҷлил гардид.

Тавре ба АМИТ «Ховар» аз Мақомоти иҷроияи ҳокимияти давлатии шаҳри Бӯстон иттилоъ доданд, зимни ифтитоҳи барномаи фарҳангии наврӯзӣ иброз гардид, ки ҷашни Наврӯз ҳамчун яке аз рамзҳои ҳувияти миллӣ ва оини суннатии ниёгони тоҷикон бо шарофати сиёсати Президенти Ҷумҳурии Тоҷикистон муҳтарам Эмомалӣ Раҳмон эҳё гардида, аз ҷониби ҷомеаи ҷаҳонӣ чун ҷашни байналмилалӣ пазируфта шудааст.

Дар базми наврӯзӣ ҳунармандони шаҳр намунаи ҳунарҳои мардумӣ, аз ҷумла суфраи наврӯзии ҳафтсину ҳафтшин, хӯрокҳои миллӣ, гӯшаҳои мероси ниёгон, кишоварзон, варзишгарон ва амсоли инҳоро ба маърази намоиш гузоштанд.

Тавре Президенти Ҷумҳурии Тоҷикистон иброз доштанд, «дар масири таърихи тӯлонии халқамон Наврӯз дар баробари забони тоҷикӣ бунёди худшиносии тоҷиконро низ ташкил додааст. Агар забони тоҷикӣ ҳомии осори фаровону ҷовидонаи илмиву адабӣ ва ҳофизаи таърихии мардуми мо бошад, ҷашни Наврӯз дарбаргирандаю нигоҳдорандаи суннатҳои зиндаи халқ, расму ойинҳо ва фарҳанги миллӣ мебошад».

АКС: Мақомоти иҷроияи ҳокимияти давлатии шаҳри Бӯстон