Тоҷикистон ба таҷрибаи бузургтарин оператори бозори неруи барқи Аврупо — Nord Pool мароқ зоҳир намуд

ДУШАНБЕ, 13.03.2026 /АМИТ «Ховар»/. Тоҷикистон ҳамкориро бо бузургтарин оператори бозори неруи барқи Аврупо — Nord Pool тақвият медиҳад, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Вазири энергетика ва захираҳои оби Ҷумҳурии Тоҷикистон Далер Ҷумъа дар Шветсия бо намояндагони оператори бозори неруи барқи Аврупо — Nord Pool мулоқот намуд, ки зимни он масъалаҳои марбут ба фаъолияти бозорҳои муосири неруи барқ, таҷрибаи кишварҳои аврупоӣ дар ташкили савдои озоди неруи барқ, инчунин механизмҳои танзими бозори минтақавии барқ баррасӣ гардиданд.
‎
‎Вазири энергетика ва захираҳои об таъкид намуд, ки Ҷумҳурии Тоҷикистон дар доираи рушди минбаъдаи низоми энергетикӣ ва ҳамгироии бозори минтақавии неруи барқ ба омӯзиш ва истифодаи таҷрибаи пешрафтаи байналмилалӣ, аз ҷумла таҷрибаи Nord Pool таваҷҷуҳи махсус зоҳир менамояд.
‎
‎Намояндагони оператори бозори неруи барқи Аврупо — Nord Pool ҳамзамон барои мубодилаи таҷриба, машваратҳои коршиносӣ ва таҳкими ҳамкорӣ дар самти рушди бозори муосири неруи барқ ибрози омодагӣ карданд.

АКС: Вазорати энергетика ва захираҳои оби Ҷумҳурии Тоҷикистон