Дар Осорхонаи миллии Тоҷикистон беш аз 800 бозёфти нодири таърихӣ ба намоиш гузошта шудааст

ДУШАНБЕ, 21.04.2026. /АМИТ «Ховар»/. Беш аз 800 бозёфти муҳим ва нодири таърихии бостоншиносони Осорхонаи миллӣ, ки аз  соли 2014 то соли 2025 ҳангоми ҳафриёт ба даст омадаанд,  дар  намоиши ҷашнӣ таҳти унвони «Дастовардҳои бостоншиносии Осорхонаи миллӣ дар замони истиқлол» ба маърази тамошо  гузошта шуданд.

АМИТ «Ховар» бо истинод ба Осорхонаи миллии Тоҷикистон иттилоъ медиҳад, ки  намоиши ҷашнии «Дастовардҳои бостоншиносии Осорхонаи миллӣ дар замони Истиқлол» бахшида ба ҷашни 35–солагии Истиқлоли давлатии Ҷумҳурии Тоҷикистон ва Рӯзи байналмилалии ҳифзи ёдгориҳои таърихию фарҳангӣ ташкил карда шуд.

Дар намоиш нигораҳое, ки аз ёдгориҳои Ғаравқалъа, Сайёд, Ҳалқаҷар, Чимқурғон, Тахти Шоҳӣ, Алмосӣ ва дигар мавзеъҳои таърихии мамлакат кашф шуда, ба давраҳои гуногуни таърихӣ  мансубанд, ба маърази тамошо  гузошта шудаанд.  Нодиртарин нигораҳои ин намоиш, ки аҳамияти илмӣ-таърихии сатҳи ҷаҳонӣ доранд, «зарфи обгирӣ бо навиштаҷоти бохтарӣ», «сангнавиштаҳои Алмосӣ (бо хат ва забони қадимии бохтарӣ)», «овезаи тиллоӣ бо тасвири Кентавр», «ҳалқаи тиллоӣ», «хурмаи чордастаи тамғадор», «баргаи тиллоӣ» ва «гӯшворҳои тиллоӣ» мебошанд.

Бостоншиносӣ чун муҳимтарин илми замони муосир барои омӯзиши таъриху фарҳанги халқу миллатҳо таърихи ҷамъияти инсониро дар асоси ёдгориҳои маданияти моддӣ меомӯзад. Аз ин рӯ, дар замони муосир ба  рушди ин соҳа таваҷҷуҳи махсус дода мешавад. Тавре ки Президенти Тоҷикистон, Пешвои миллат муҳтарам Эмомалӣ Раҳмон дар Паём ба Маҷлиси Олӣ таъкид намудаанд, «бедор намудани хотираи таърихӣ дар таҳкими ҳисси миллии шаҳрвандон, махсусан ҷавонон, ки ояндаи миллат ва давлат мебошанд, нақши бисёр муҳим дорад. Мероси таърихию фарҳангӣ шиносномаи миллати куҳанбунёди тоҷик мебошад, ки ёдгориҳои бостонӣ зиёда аз 70 фоизи онро ташкил медиҳанд».

Осорхонаи миллӣ аз соли 2014 ҳафриёти бостоншиносии мустақилонаро дар ёдгориҳои гуногуни таърихии мамлакат идома дода, то инҷониб дар зиёда аз 10 ёдгорӣ ковишҳо анҷом дода шудаанд. Давоми 12 соли охир ёдгориҳои Ғаравқалъа, Сайёд, Ҳалқаҷар, Чимқурғон, Тахти Шоҳӣ, Куҳначинор, Алмосӣ, Сари Майн, Моинкаҷ, Теппаи Ғозиён, Саразм 2 пурра ва ё қисман омӯхта шудаанд.

Дар намоиш дастовардҳои беҳтарини ин ёдгориҳо пешниҳоди тамошобинон гардиданд, ки аз  тилло, нуқра, мису биринҷӣ, сангу сафол ва устухон сохта шуда, таҷассумгари мероси пурғановат ва ҳунари волои ниёгонамон мебошанд.

Намоиши «Дастовардҳои бостоншиносии Осорхонаи миллӣ дар замони истиқлол» то 30 апрел идома меёбад.

АКС: Осорхонаи миллии Тоҷикистон