Дар шаҳри Ҳисор кишти пунбадона оғоз ёфт

ДУШАНБЕ, 05.04.2026 /АМИТ «Ховар»/. Дар хоҷагиҳои пахтакори шаҳри Ҳисор маъракаи кишти пунбадона оғоз гардид, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор.

Тибқи маълумоти Раёсати кишоварзии шаҳр, кишти пунбадона дар якчанд хоҷагии пахтакорӣ шуруъ шуда, деҳқонон азм доранд дар муддати кӯтоҳ ва бо сифати баланд иҷрои дурнамои кишти пахтаро дар зиёда аз 800 гектар таъмин намоянд. Кишти пунбадона дар хоҷагии деҳқонии шарикии «Мурутак»-и Ҷамоати деҳоти Ориён бо иштироки роҳбарият, кормандони соҳаи агросаноатии шаҳр ва бо дуои пирони кор- деҳқонони собиқадор оғоз шуд.

Роҳбарияти шаҳр ҳамчунин дар Ҷамоати деҳоти Ҳисор бо ҷараёни кишти пунбадона бо усули зери плёнка шинос шуда, бо роҳбарони хоҷагиҳои кишоварзии пахтакор оид ба бартарияти ин усул суҳбат карданд. Гуфта шуд, ки истифодаи таҷрибаҳои пешрафта, аз ҷумла кишти пахта дар зери плёнка якчанд бартарият дошта, барои гирифтани ҳосили фаровон ва баландсифат замина мегузорад. Ин усул хароҷоти истеҳсолиро кам карда, ба афзоиши ҳосилнокӣ мусоидат менамояд. Минбаъд зарур аст, ки дигар хоҷагиҳои пахтакор низ зина ба зина ба ин усул гузаранд.

АКС: Мақомоти иҷроияи ҳокимияти давлатии шаҳри Ҳисор