Дар Тоҷикистон дар беш аз 23 ҳазор гектар пунбадона кишт намудаанд

ДУШАНБЕ, 07.04.2026. /АМИТ «Ховар»/. То 4 апрел кишоварзони Тоҷикистон дар 23 320 гектар пунбадона  кишт намуданд, ки аз он ба  вилоятҳои Суғд 2701 гектар, Хатлон 22 597 гектар ва ноҳияҳои тобеи ҷумҳурӣ 22 гектар рост меояд.

Тавре аз Вазорати кишоварзии Ҷумҳурии Тоҷикистон иттилоъ доданд, соли 2026 нақшаи кишти пунбадона 186 800 гектарро ташкил медиҳад.

Дар айни замон бо мақсади ба даст овардани ҳосили фаровон ва саҳмгузорӣ дар рушди иқтисоди миллӣ дар тамоми хоҷагиҳои деҳқонӣ маъракаи кишти пунбадона идома дорад.

Пахтакорӣ на танҳо ба таъмини соҳаи саноати мамлакат бо ашёи хом мусоидат менамояд, балки дар таъмини аҳолӣ бо ҷойи кор ва истеҳсоли маҳсулоти тайёр низ нақши калидӣ дорад.

Кишоварзон тухмиҳои босифатро бо ҷалби техникаҳои муосир кишт менамоянд. Инчунин тухмиҳои ба шароити иқлими минтақа мутобиқ ва серҳосил истифода карда мешаванд.

Пахта маҳсулоти асосии содиротии давлат ба шумор меравад, ки сол то сол арзиши аслии он дар бозори ҷаҳонӣ тамоюли болоравӣ дорад. Аз ин рӯ пахтакорони мамлакат талош доранд, ки дар баланд шудани иқтидори истеҳсолӣ, афзоиши даромади иқтисодӣ ва беҳтар намудани сатҳи зиндагии аҳолӣ таъсир гузоранд.

АКС: АМИТ «Ховар»