«ДИДОР». Бахшида ба 35-солагии Истиқлоли давлатӣ намоиши мусаввараҳои нодир ифтитоҳ ёфт

ДУШАНБЕ, 14.04.2026. /АМИТ «Ховар»/. Имрӯз дар Осорхонаи миллии Тоҷикистон ба муносибати 35-солагии Истиқлоли давлатӣ таҳти унвони «Дидор» намоиши бошукуҳи осори тармимшуда ифтитоҳ гардид.

Тавре ба АМИТ «Ховар» аз ин осорхона хабар доданд, намоиши «Дидор» рамзи эҳтиром ба таърихи санъати миллӣ ва таҷассуми таваҷҷуҳи хоссаи давлат ба ҳифзи сарватҳои маънавӣ дар соли ҷашнӣ мебошад. Намоиш то 20 май идома меёбад.

Намоиш идомаи тадбирҳои созанда дар самти эҳё ва ҳифзи мероси гаронбаҳои фарҳангӣ дар даврони соҳибистиқлолӣ ба ҳисоб рафта, меҳвари намоишро 73 мусаввараи нодир ташкил медиҳад. Ин мусаввараҳо маҳсули дасти рассомони маъруфи собиқ Иттиҳоди Шуравӣ мебошанд.

Хусусияти хоси намоиш он аст, ки ин осор аз солҳои 1960 ба маърази тамошо гузошта нашуда буд. Сабаби асосии он ба тармим ниёз доштани асарҳо буд. Ҷойгоҳи махсусро дар намоиш асари рассоми олмонӣ Винклер А. «Манзараи кӯҳӣ. Миёнаи асри XIX» ишғол мекунад, ки қадимтарин намуна дар коллексияи пешниҳодшуда буда, ҳамчун «гавҳари намоиш» шинохта мешавад.

Иттилоъ дода шуд, ки тамоми осори дар намоиш гузошташуда пас аз раванди мураккаби тармиму таҳким бори аввал ба маърази тамошои омма гузошта шуд. Экспозитсияи намоиш аз ҷиҳати жанр ва сабк хеле рангин буда, асарҳои воқеъгароёна ва тахайюлиро фаро мегирад.

Зимни тамошои намоиш тамошобинон имкон пайдо намуданд, ки бо беҳтарин намунаи жанрҳо-чеҳранигорӣ, манзаранигорӣ, тасвири лаҳзаҳои таърихӣ ва рӯзгори мардум шинос шаванд.

Дар канори мусаввараҳо инчунин намунаҳои гуногуни ҳайкалтарошӣ, осори санъати ороишӣ-амалӣ, аз қабили кулолгарӣ ва кандакории бадеӣ пешкаши меҳмонон мегардад.

АКС: Осорхонаи миллии Тоҷикистон