Файзалӣ Идизода дар ҷаласаи Шурои Ассамблеяи парламентии СААД дар шаҳри Москва иштирок намуд

ДУШАНБЕ, 21.04.2026. /АМИТ «Ховар»/.  20 апрел  ҷаласаи навбатии Шурои Ассамблеяи парламентии  Созмони Аҳдномаи амнияти дастҷамъӣ дар шаҳри Москваи Федератсияи Русия баргузор гардид, ки дар он Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода иштирок намуд.  Дар ин хусус ба АМИТ «Ховар» аз Маҷлиси намояндагон хабар доданд.

Қабл аз оғози ҷаласаи Шурои Ассамблеяи парламентии Созмони Аҳдномаи амнияти дастҷамъӣ раисони парламентҳои кишварҳои Созмони Аҳдномаи амнияти дастҷамъӣ дар маросими тантанавии гузоштани гулчанбар дар назди Қабри аскари  номаълум дар боғи Александрови назди Қасри Кремл иштирок намуда, хотираи қаҳрамонони Ҷанги дуюми ҷаҳонро гиромӣ доштанд. Иштирокчиёни маросим бо дақиқаи хомӯшӣ хотираи ҷанговаронеро, ки барои озодӣ ҷон фидо кардаанд, пос доштанд.

Дар ҷаласа Файзалӣ Идизода аз мавқеи доимии сулҳҷӯёнаи Тоҷикистон ёдовар шуда, иброз намуд, ки Президенти Ҷумҳурии Тоҷикистон муҳтарам Эмомалӣ Раҳмон пайваста таъкид менамоянд, ки Тоҷикистон ҳамеша ҷонибдори ҳалли осоиштаи ҳама гуна буҳрону муноқишаҳо танҳо тавассути музокирот ва талошҳои сиёсиву дипломатӣ мебошад.

Татбиқи самаранок ва ҳамаҷонибаи санадҳо ва қарорҳои қабулшуда дар доираи Созмони Аҳдномаи амнияти дастҷамъӣ аҳаммияти махсус дорад. Файзалӣ Идизода изҳори итминон намуд, ки чорабиниҳои барои соли равон банақшагирифтаи Созмони Аҳдномаи амнияти дастҷамъӣ, аз ҷумла машқҳои муштараки ҳарбӣ муваффақона баргузор мегарданд.

Файзалӣ Идизода ба пешбурди ташаббусҳои миллӣ дар доираи Созмон таваҷҷуҳи махсус зоҳир намуд.  Ҳамзамон таъкид намуд, ки ҳамкории байнипарлумонӣ, инчунин санадҳои намунавӣ ва тавсияҳои  Созмони Аҳдномаи амнияти дастҷамъӣ дар ташаккули заминаи боэътимоди ҳуқуқӣ барои муқовимати фаъолона ба чолишҳо ва таҳдидҳои муосир нақши муҳим доранд.

АКС: Маҷлиси намояндагони Маҷлиси Олии Ҷумҳурии Тоҷикистон