«ФУРӮҒИ МАЪРИФАТ». Дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз шуд
ДУШАНБЕ, 02.04.2026 /АМИТ «Ховар»/. Имрӯз дар Китобхонаи давлатии бачагонаи ҷумҳуриявии ба номи Мирсаид Миршакар дар шаҳри Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» таҳти унвони «Фурӯғи маърифат» оғоз гардид. Фестивали мазкур то 9 апрел идома меёбад, иттилоъ медиҳад АМИТ «Ховар».
Пеш аз оғози фестивал намоиши китоб доир гардид, ки дар он садҳо номгӯй асарҳои бачагона аз адабиёти тоҷик ва ҷаҳон ба намоиш гузошта шуд. Инчунин намоиши дастранҷи кӯдакону наврасон, фурӯши китобу рӯзнома ва маҷаллаҳои тозанашр доир гардид. Иштирокдорони фестивал дар ин ҷо имкони тамошои порчаҳоро аз намоишҳои театрӣ пайдо карданд.
Хонандагон аз ашъори шоирон оид ба мутолиаи китоб ва дӯст доштани ин шуғл шеър қироат намуданд. Кӯдакону наврасон бо адибони шинохтаи тоҷик суҳбат намуда, таассуроти хешро доир ба китобҳои хондаашон баён намуданд.
Рӯзҳои дигари фестивал ва ҷамъбасти он тибқи нақшаи китобхонаҳои ҷумҳурӣ бо иштироки адибон, олимон ва коршиносони соҳа дар шаҳрҳои Душанбе, Шаҳринав, Турсунзода, Варзоб, Роғун, Ҳисор, Ваҳдат ва ноҳияи Рӯдакӣ баргузор мегарданд.
Тавре ба хабарнигори АМИТ «Ховар» директори Китобхонаи давлатии бачагонаи ҷумҳуриявии ба номи Мирсаид Миршакар Ҳусейн Сафарзода иброз намуд, дар Тоҷикистон ин фестивал ба ҳукми анъана даромадааст. Дар ҷараёни он намоиши китобҳои тозанашр барои бачаҳо, вохӯрӣ бо адибон, барномаҳои консертӣ бо иштироки хонандагони мактабҳо ва маҳфилҳои адабӣ баргузор мегарданд.
Ёдовар мешавем, ки аз соли 1967 ҷомеаи ҷаҳонӣ 2 апрелро ҳамасола чун Рӯзи байналмилалии китоби бачагона бо баргузории чорабиниҳои мухталифи фарҳангӣ таҷлил менамояд. Дар Тоҷикистон низ ба муносибати ин рӯз барномаҳои гуногуни фарҳангӣ доир мегарданд, ки Фестивали ҷумҳуриявии «Ҳафтаи китоби кӯдакону наврасони Тоҷикистон» аз ин ҷумла аст.
Ҳадаф аз баргузории он ҷалби насли наврас ба мутолиаи китоб, баланд бардоштани сатҳи фарҳанги иттилоотии кӯдакону наврасон, ҷавонон ва ба ин васила дар замири онҳо тарбия намудани ҳисси ифтихори миллӣ, ватандӯстӣ ва гиромидошти арзишҳои милливу умумибашарӣ мебошад.
Фирӯза ДАВЛАТЗОДА,
АМИТ «Ховар»
АКС: АМИТ «Ховар»
Ҳамкории илмии Институти астрофизикаи Тоҷикистон ва Институти астрономияи Узбекистон густариш меёбад
Пагоҳ дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз мегардад
Наврӯзи байналмилалиро дар Академияи миллии илмҳо бо риояи суннату анъанаҳои миллӣ таҷлил намуданд
Дар Китобхонаи миллӣ Рӯзи дарҳои боз доир шуд
Дар Душанбе намоиш-фурӯши китобҳои тозанашр баргузор мегардад
ТАЪРИХИ ВАТАН МЕОМӮЗЕМ! Саёҳати наврасону ҷавонон ба осорхонаҳо ва мавзеъҳои таърихии Тоҷикистон ташкил карда мешавад
Намояндагони Тоҷикистон дар Бозиҳои Делфии давлатҳои аъзои СҲШ соҳиби 7 медал гардиданд
Рӯзҳои фарҳанги Ҷопон дар Тоҷикистон бо намоиши ҷашну анъана ва ҳунарҳои мардумӣ баргузор шуд
Робитаҳои дӯстонаи давлатию миллӣ ва илмию фарҳангии Тоҷикистону Узбекистон тақвият меёбанд
ТОҚИДӮЗӢ — ҲУНАРИ ҚАДИМӢ. Равнақи он анъанаҳои миллиро ҳифз менамояд
Моҳи май даври дуюми Озмуни ҷумҳуриявии «Фурӯғи субҳи доноӣ китоб аст» баргузор мегардад
Дар Тоҷикистон ҳунари муҷассамасозӣ ва ҳайкалтарошӣ рушд менамояд
