Сафири Тоҷикистон бо Раиси Жогорку Кенеши Ҷумҳурии Қирғизистон мулоқот намуд

ДУШАНБЕ, 28.04.2026. /АМИТ «Ховар»/. Дар шаҳри Бишкек мулоқоти Сафири Фавқулода ва Мухтори Ҷумҳурии Тоҷикистон дар Ҷумҳурии Қирғизистон Назирмад Ализода бо Раиси Жогорку Кенеши Ҷумҳурии Қирғизистон Марлен Маматалиев баргузор гардид.

Тавре ба АМИТ «Ховар» аз Сафорати Ҷумҳурии Тоҷикистон дар Ҷумҳурии Қирғизистон хабар доданд, зимни вохӯрӣ ҷонибҳо вазъи кунунӣ ва дурнамои рушди муносибатҳои Тоҷикистону Қирғизистон, инчунин масъалаҳои мубрами ҳамкории дуҷонибаро баррасӣ намуданд.

Дар мулоқот ба рушди ҳамкории байнипарлумонӣ таваҷҷуҳи махсус зоҳир карда шуд. Ҷонибҳо аҳаммияти дипломатияи парлумониро дар таҳкими эътимоди мутақобил, густариши робитаҳо байни кумитаҳои соҳавӣ ва гурӯҳҳои дӯстӣ, инчунин ҳамоҳангсозии мавқеъҳо дар заминаҳои байналмилалии парлумонӣ таъкид намуданд.

Сафир таъкид намуд, ки дар айни замон муносибатҳои ду мамлакат дар маҷрои мусбат рушд ёфта, тавофуқҳои ҳосилшуда оид ба масъалаҳои сарҳадӣ барои таҳкими минбаъдаи ҳамкорӣ имконияти нав фароҳам овардаанд. Дар ин замина аҳаммияти татбиқи пайгиронаи тавофуқҳои қаблан ҳосилшуда, инчунин густариши ҳамкорӣ дар бахшҳои тиҷоратию иқтисодӣ, фарҳангию гуманитарӣ ва дигар самтҳо таъкид гардид.

Дар фарҷоми мулоқот ҷонибҳо барои таҳкими минбаъдаи муносибатҳои Тоҷикистону Қирғизистон, ки бар пояи усулҳои ҳамсоягии нек, эҳтироми мутақобил ва эътимод асос ёфтаанд, ибрози омодагӣ намуданд.

АКС: Сафорати Ҷумҳурии Тоҷикистон дар Ҷумҳурии Қирғизистон