Сарвазири Бурунди: «Тоҷикистон ба маркази муколамаи глобалӣ оид ба масъалаҳои об табдил ёфтааст»

ДУШАНБЕ, 26.05.2026 /АМИТ «Ховар»/. Об набояд ба омили ҷудоиандозӣ байни миллатҳо табдил ёбад, балки бояд ҳамчун мероси муштараки башарият барои сулҳ, ҳамкорӣ ва ҳамбастагии инсонҳо хизмат намояд. Чунин изҳор дошт Сарвазири Ҷумҳурии Бурунди Нестор Нтахонтюэ зимни суханронӣ дар Конфронси чоруми байналмилалии сатҳи баланд оид ба татбиқи Даҳсолаи байналмилалии амал «Об барои рушди устувор, солҳои 2018–2028» дар шаҳри Душанбе, иттилоъ медиҳад АМИТ «Ховар».

Ба андешаи Нестор Нтахонтюэ, татбиқи Даҳсолаи байналмилалии амал «Об барои рушди устувор» ва Ҳадафҳои рушди устувори Созмони Милали Муттаҳид, бахусус ҳадафи шашум вобаста ба таъмини дастрасӣ ба оби тозаи нӯшокӣ ва беҳдошт барои ҷомеаи ҷаҳонӣ аҳаммияти калидӣ дорад.

Сарвазири Бурунди таъкид намуд, ки оби тозаи нӯшокӣ ва хизматрасониҳои санитарӣ аз муҳимтарин омилҳои ҳифзи саломатии инсон ба шумор рафта, ҳуқуқ ба оби бехатар ва беҳдошт ҳамчун ҷузъи ҷудонашавандаи ҳуқуқҳои инсон эътироф шудааст.

Нестор Нтахонтюэ изҳор дошт, ки «мушкилоти дастрасӣ ба об ва санитария, пеш аз ҳама, ба кишварҳои рӯ ба рушд, бахусус давлатҳои Африқо таъсири ҷиддӣ мерасонад. Ҷумҳурии Бурунди барои беҳтар намудани дастрасии аҳолӣ ба оби нӯшокӣ, таҳкими низоми беҳдошт ва идоракунии самараноки захираҳои обӣ тадбирҳои пайгирона амалӣ менамояд».

Ба назари ӯ, идоракунии ҳамгироёнаи захираҳои обӣ, аз ҷумла дар ҳавзаҳои фаромарзӣ яке аз самтҳои муҳими таъмини рушди устувор мебошад.

Иброз гардид, ки Ҷумҳурии Бурунди ба таҳкими ҳамкории минтақавӣ ва байналмилалӣ дар бахши идоракунии муштараки захираҳои обӣ аҳаммияти махсус дода, ҷонибдори истифодаи одилонаю устувори об мебошад.

Сарвазири Бурунди ҳамчунин ташаббусҳои байналмилалии Ҷумҳурии Тоҷикистонро дар соҳаи об ва иқлим, аз ҷумла ташаббусҳо оид ба ҳифзи пиряхҳо ва пешбурди рӯзномаи ҷаҳонии обро баланд арзёбӣ намуд. Мавсуф таъкид кард, ки Душанбе имрӯз ба платформаи муҳими муколамаи байналмилалӣ оид ба масъалаҳои об табдил ёфта, Конфронси оби СММ дар соли 2026 марҳилаи муҳими таҳкими ҳамкории ҷаҳонӣ дар ин самт арзёбӣ мегардад.

Дар суханронӣ инчунин ба таъсири тағйирёбии иқлим ба захираҳои табиӣ ва гурӯҳҳои осебпазир, бахусус занону кӯдакон ишора гардида, зарурати истифодаи роҳҳои инноватсионӣ, табодули дониш, рушди технологияҳои муосир ва ҷалби ҷавонону занон ба раванди қабули қарорҳо таъкид карда шуд.

Нестор Нтахонтюэ дар анҷоми суҳбат гуфт, ки «ҳеҷ давлат наметавонад дар танҳоӣ бо мушкилоти глобалии вобаста ба об ва иқлим мубориза барад. Танҳо тавассути ҳамбастагӣ, ҳамкории байналмилалӣ ва татбиқи иқдомҳои муштарак метавон барои наслҳои оянда ояндаи амну устуворро таъмин кард».

Зарангези ЛАТИФ,
АМИТ «Ховар»

АКС: АМИТ «Ховар»