Бахшида ба Рӯзи байналмилалии занон дар дипломатия ҳамоиш доир шуд

ДУШАНБЕ, 26.06.2026 /АМИТ «Ховар»/.  Бахшида ба Рӯзи байналмилалии занон дар дипломатия, ки бо қатъномаи Маҷмаи Умумии Созмони Милали Муттаҳид таъсис дода шудааст, дар Вазорати корҳои хориҷии Ҷумҳурии Тоҷикистон ҳамоиш баргузор шуд. Дар ин хусус АМИТ «Ховар» бо истинод ба Вазорати корҳои хориҷӣ хабар медиҳад.

Дар ҳамоиш ба масъалаҳои густариши иштироки занон дар хизмати дипломатӣ ва пешбурди равиши фарогир дар муносибатҳои байналмилалӣ  таваҷҷуҳ  зоҳир гардид.

Иштирокдорон оид ба аҳамияти саҳми занон дар рушди дипломатияи муосир, нақши онҳо дар таҳкими ҳамкории байналмилалӣ, ҳифзи сулҳ ва пешбурди рушди устувор ибрози назар намуданд.

Гуфта шуд, ки густариши иштироки занон дар раванди қабули қарорҳо дар ҳамаи сатҳҳо омили муҳими баланд бардоштани самаранокӣ ва устувории ниҳодҳои байналмилалӣ мебошад.

Таваҷҷуҳи махсус ба нақши собиқадорони хизмати дипломатӣ дар ташаккул ва рушди дипломатияи тоҷик зоҳир гардид. Иштирокчиён аҳамияти ҳифз ва интиқоли таҷрибаи касбӣ, дониш ва анъанаҳои дипломатиро ба насли ҷавони мутахассисон таъкид намуданд.

Ҳамчунин аҳамияти пайванди наслҳо ҳамчун яке аз омилҳои калидии таҳкими минбаъдаи мактаби миллии дипломатия ва омода намудани кадрҳои баландихтисос барои хизмати сиёсати хориҷии мамлакат таъкид карда шуд.

АКС: Вазорати корҳои хориҷии Ҷумҳурии Тоҷикистон