Дар Минтақаи озоди иқтисодии «Суғд» корхонаи истеҳсоли дучарха ва сечархаҳои барқӣ сохта мешавад

ДУШАНБЕ, 08.06.2026. /АМИТ «Ховар»/. Дар Минтақаи озоди иқтисодии «Суғд» аз ҷониби ширкати чинии LTD «Chuangxinmeng» корхонаи истеҳсоли дучарха ва сечархаҳои барқӣ бунёд карда мешавад. Ин масъала 4 июни соли равон зимни вохӯрии роҳбарияти Минтақаи озоди иқтисодии «Суғд» бо намояндаи ширкати чинии LTD «Chuangxinmeng» баррасӣ гардид, хабар медиҳад АМИТ «Ховар» бо истинод ба МОИ –и «Суғд».

Тибқи иттилои манбаъ, зимни вохӯрии роҳбари МОИ –и «Суғд» Муҳаммад Муҳаммадзода бо намояндаи ширкати чинии LTD «Chuangxinmeng» хонум Менг Мин густариши минбаъдаи ҳамкории мутақобилан судманд баррасӣ гардид.

Муҳаммад Муҳаммадзода соҳибкори хориҷиро бо фаъолияти минтақа, имтиёзҳои қонунгузории Ҷумҳурии Тоҷикистон барои сармоягузорон шинос намуда, изҳор дошт, ки маъмурияти минтақа барои ҳамкории судманд бо соҳибкорон ва сармоягузорони Ҷумҳурии Мардумии Чин ҳамаҷониба омода аст. Ҷонибҳо ҷиҳати амалӣ намудани мувофиқаҳои дар суҳбат бадастомада, аз ҷумла бунёди корхонаи истеҳсоли дучарха ва сечархаҳои барқӣ изҳори ҳавасмандӣ намуданд.

Ёдовар мешавем, ки Минтақаи озоди иқтисодии «Суғд» истеҳсолию инноватсионӣ буда, бо Қарори Ҳукумати Ҷумҳурии Тоҷикистон 2 майи соли 2008 таъсис дода шуда, фаъолиятро аз моҳи апрели соли 2009 оғоз намудааст. Дар айни замон шумораи суъбектҳои МОИ «Суғд» зиёда аз 40 ададро ташкил медиҳад.

Субъектҳои Минтақаи озоди иқтисодии «Суғд» на танҳо ба истеҳсоли маҳсулоти воридотивазкунанда машғул мебошанд, балки доду гирифти тиҷоратиро бо кишварҳои хориҷӣ вусъат дода истодаанд. Аллакай молу маҳсулоти дар корхонаҳои ин минтақаи озоди иқтисодӣ истеҳсолшаванда ба давлатҳои Қазоқистон, Қирғизистон, Узбекистон, Афғонистон, Туркманистон, Олмон, Ироқ, Туркия ва Федератсияи Русия содирот карда мешавад.

АКС: Минтақаи озоди иқтисодии «Суғд»