Дар ноҳияи Бобоҷон Ғафуров 199 гармхона фаъолият дорад

ДУШАНБЕ, 14.06.2026 /АМИТ «Ховар»/.  Ба ҳолати 1 январи соли 2026,  дар ноҳияи Бобоҷон Ғафурови вилояти Суғд 199 гармхона фаъолият дошта, масоҳати умумии онҳо ба 27,2 гектар баробар мебошад. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Дар ноҳияи Бобоҷон Ғафуров Ҷамъияти дорои масъулияти маҳдуди «ММК- Агро» нақша дорад, ки майдони гармхонаҳоро боз ҳам васеъ намояд. Дар лоиҳаи нави гармхонаи бунёдшаванда гармхонаи истеҳсолӣ — инноватсионии замонавӣ дар минтақаи Сомғори ноҳия бо технологияи пешрафтаи ҳолландӣ сохта мешавад.

Тибқи маълумот, масоҳати умумии гармхонаи нав 6,3 гектарро ташкил дода, баъди ба истифода қарор гирифтан барои афзоиши истеҳсоли сабзавоту маҳсулоти тару тозаи ватанӣ ва таъмини бозори истеъмолӣ дар тамоми фаслҳои сол мусоидат хоҳад кард.

Инчунин солҳои охир дар шаҳру ноҳияҳои кишоварзии вилояти Суғд бунёди гармхонаҳо вусъати тоза гирифта, ин раванд барои баланд бардоштани ҳаҷми истеҳсолот, таъсиси ҷойҳои нави корӣ ва таъмини амнияти озуқаворӣ заминаи мусоид фароҳам овардааст.

Ҳамчунин бунёди гармхонаҳои муосир аз ҷониби ширкатҳои ватанӣ, аз ҷумла ширкати «Барс» иқдоми муҳим дар роҳи рушди соҳаи кишоварзӣ ва татбиқи технологияҳои нав арзёбӣ гардида, барои таҳкими иқтидори истеҳсолии минтақа аҳамияти калон дорад.

Бо дастгирӣ ва таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи кишоварзӣ, истифодаи самараноки замин ва афзоиши истеҳсоли маҳсулоти кишоварзӣ аҳамияти махсус дода мешавад.

Таъмини амнияти озуқавории мамлакат яке аз ҳадафҳои стратегии Ҳукумати ҷумҳурӣ ба шумор рафта, дар ин самт дар вилояти Суғд тадбирҳои муассир амалӣ карда мешаванд.

АКС: Хадамоти матбуоти Раиси вилояти Суғд