Дар «Саноатсодиротбонк» Рӯзи Ваҳдати миллиро таҷлил намуданд

ДУШАНБЕ, 26.06.2026 /АМИТ «Ховар»/. Ба муносибати 29-солагии Рӯзи Ваҳдати миллӣ ва қабули ташаббуси нави Ҷумҳурии Тоҷикистон таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036» дар Корхонаи воҳиди давлатии Бонки саноативу содиротии Тоҷикистон «Саноатсодиротбонк» ҳамоиши тантанавӣ таҳти унвони «Ваҳдати миллӣ – омили муҳими рушди давлат ва ҷомеа» баргузор гардид.

Дар ҳамоиш аҳамияти таърихии ба даст омадани Ваҳдати миллӣ ҳамчун дастоварди бузурги халқи Тоҷикистон ва заминаи боэътимоди сулҳу субот, рушди устувори иқтисодиву иҷтимоӣ ва таҳкими давлатдории миллӣ мавриди таҳлилу баррасӣ қарор гирифт.

Таъкид шуд, ки маҳз ба шарофати сиёсати сулҳофарину ваҳдатгустари Пешвои миллат барои рушди соҳаҳои гуногуни иқтисоди миллӣ, татбиқи ислоҳоти созанда ва беҳтар гардидани сатҳи зиндагии аҳолӣ заминаи мусоид фароҳам омадааст.

Зимни ҳамоиш иштирокдорон инчунин қабули ташаббуси нави байналмилалии Ҷумҳурии Тоҷикистон таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036», ки бо қатъномаи Маҷмаи Умумии Созмони Милали Муттаҳид қабул гардид, истиқбол намуда, онро нишонаи эътирофи нақши Тоҷикистон дар пешбурди рӯзномаи ҷаҳонии сулҳ ва таҳкими ҳамкории байналмилалӣ арзёбӣ карданд.

Иштирокчиён аз қабули ин қатънома изҳори хушҳолӣ намуда, таъкид карданд, ки чунин ташаббусҳо ҷойгоҳи Тоҷикистонро ҳамчун давлати сулҳпарвар ва пешбарандаи иқдомҳои байналмилалии созанда боз ҳам таҳким мебахшанд.

Дар фарҷоми ҳамоиш иброз гардид, ки ҳифз ва таҳкими ваҳдати миллӣ, эҳтиром ба арзишҳои давлатдорӣ ва тақвияти ҳисси масъулияти шаҳрвандӣ вазифаи муқаддаси ҳар як сокини мамлакат мебошад.

Таъкид гардид, ки ваҳдату ҳамбастагӣ ҳамчун омили асосии суботи сиёсӣ ва пешрафти устувор кафили фардои ободу осудаи Тоҷикистони соҳибистиқлол мебошад.

АКС: Корхонаи воҳиди давлатии Бонки саноативу содиротии Тоҷикистон «Саноатсодиротбонк»