Дар Осорхонаи миллии Тоҷикистон маҳфили «Шоҳномахонӣ» баргузор гардид

ДУШАНБЕ, 03.07.2026 /АМИТ «Ховар»/. «Шоҳнома — паёми сулҳ, ваҳдат ва инсонгароӣ барои наслҳои оянда»- таҳти ин унвон дар Осорхонаи миллии Тоҷикистон маҳфили «Шоҳномахонӣ» баргузор гардид, иттилоъ медиҳад АМИТ «Ховар» бо истинод ба осорхона.

Ин чорабинии фарҳангӣ бахшида ба эълон гардидани «Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036» ва бо мақсади тарғиби арзишҳои сулҳу ваҳдат, эҳёи мероси гаронбаҳои фарҳангиву адабӣ, таҳкими худшиносии миллӣ ва баланд бардоштани фарҳанги суханварии кормандони Осорхонаи миллӣ гузаронида шуд.

Директори Осорхонаи миллӣ Зафаршо Иброҳимзода доир ба аҳамияти ташаббуси навбатии байналмилалии Ҷумҳурии Тоҷикистон таҳти роҳбарии Президенти мамлакат муҳтарам Эмомалӣ Раҳмон оид ба эълон гардидани «Даҳсолаи байналмилалӣ оид ба таҳкими сулҳ барои наслҳои оянда» ва нақши мероси адабии ниёгон дар таҳкими фарҳанги сулҳ ибрози назар намуд.

Таъкид гардид, ки шоҳасари безаволи Ҳаким Абулқосим Фирдавсӣ на танҳо намунаи олии адабиёти классикии тоҷику форс, балки сарчашмаи муҳими тарбияи маънавӣ, ватандӯстӣ, адолатпарварӣ, сулҳхоҳӣ ва ваҳдати ҷомеа ба шумор меравад. Арзишҳои волои инсонӣ, ки дар ин асари бузург таҷассум ёфтаанд, имрӯз низ дар таҳкими фарҳанги сулҳ ва тарбияи насли оянда аҳамияти хосса доранд.

Иштирокдорон порчаҳо аз достонҳои «Шоҳнома»-ро қироат намуда, муҳтавои ахлоқӣ, тарбиявӣ ва инсонгароёнаи онҳоро шарҳу тавзеҳ доданд.

Гуфта шуд, ки баргузории чунин маҳфилҳои фарҳангиву маърифатӣ дар партави ташаббусҳои байналмилалии Ҷумҳурии Тоҷикистон барои таҳкими сулҳу ваҳдат, баланд бардоштани сатҳи маърифат, рушди фарҳанги китобхонӣ ва ҷалби ҷавонон ба омӯзиши осори гаронбаҳои адабиёти миллӣ мусоидат менамояд.

«Омӯзиш ва тарғиби осори ҷовидонаи «Шоҳнома» метавонад дар таҳкими арзишҳои инсондӯстӣ, таҳаммулгароӣ ва сулҳпарварӣ байни наслҳои имрӯз ва фардо саҳми арзанда гузорад»,-таъкид шуд дар маҳфил.

АКС: Осорхонаи миллии Тоҷикистон