САЙЁҲИИ РАҚАМӢ. Дар Душанбе лоиҳаи замимаи мобилии «Ватан» муаррифӣ гардид

ДУШАНБЕ, 15.09.2026 /АМИТ «Ховар»/. 14 сентябр дар Кумитаи рушди сайёҳии назди Ҳукумати Ҷумҳурии Тоҷикистон лоиҳаи сайёҳии «Ватан», ки онро хонандаи синфи 11-уми Муассисаи таҳсилоти миёнаи умумии №6-и ноҳияи Шоҳмансури шаҳри Душанбе Мирмуҳаммад Мирҷамолов таҳия намудааст, муаррифӣ гардид. Дар ин хусус ба АМИТ «Ховар» аз ин кумита хабар доданд.

Лоиҳаи «Ватан» ҳамчун замимаи мобилӣ бо мақсади муаррифии имкониятҳои сайёҳии Тоҷикистон ва фароҳам овардани дастрасии осон ба маълумот оид ба мавзеъҳои таърихию фарҳангӣ ва табиии мамлакат таҳия шудааст. Замима маълумотро дар бораи меҳмонхонаҳо, осоишгоҳҳо, тарабхонаю қаҳвахонаҳо ва дигар мавзеъҳои ҷолиби сайёҳӣ дар бар мегирад.

Зимни муаррифии лоиҳа иброз гардид, ки ин ташаббус яке аз намунаҳои истифодаи технологияҳои муосир дар рушди соҳаи сайёҳӣ ва ҷалби ҷавонон ба равандҳои рақамикунонии соҳа мебошад.

Барои такмили минбаъдаи лоиҳа аз ҷониби иштирокчиён як қатор тавсияҳои амалӣ пешниҳод гардид. Аз ҷумла, васеъ намудани маълумот дар бораи мавзеъҳои сайёҳӣ, такмили тарҳи замима, фароҳам овардани имкониятҳои иловагӣ барои истифодабарандагон ва таҳкими ҳамкорӣ бо ширкатҳои сайёҳӣ муҳим арзёбӣ гардид.

Таъкид шуд, ки рушди чунин ташаббусҳои эҷодкоронаи ҷавонон ба баланд бардоштани маърифати рақамӣ, истифодаи васеи технологияҳои иттилоотӣ дар соҳаи сайёҳӣ ва муаррифии имкониятҳои сайёҳии мамлакат мусоидат менамояд.

Лоиҳаи сайёҳии «Ватан» дар оянда метавонад ҳамчун воситаи иловагии муаррифии захираҳои сайёҳии Тоҷикистон, ҷалби сайёҳони дохилию хориҷӣ ва рушди хизматрасониҳои рақамӣ дар соҳа истифода шавад.

Гуфта шуд, ки Кумитаи рушди сайёҳии назди Ҳукумати Ҷумҳурии Тоҷикистон ташаббусҳои созанда ва лоиҳаҳои инноватсионии ҷавононро, ки ба рушди сайёҳӣ, муаррифии арзишҳои миллӣ ва истифодаи технологияҳои муосир равона шудаанд, муҳим шуморида, пайваста дастгирӣ менамояд.

АКС: Кумитаи рушди сайёҳии назди Ҳукумати Ҷумҳурии Тоҷикистон