Ҳамкории мутақобили судманди Тоҷикистон ва Кувайт дар арсаҳои гуногун баррасӣ гардид

ДУШАНБЕ, 07.10.2026 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Давлати Кувайт Хусрав Нозирӣ дар Қасри Баён бо Вазири умури Девони Амирии Давлати Кувайт Шайх Ҳамад Ҷобир Ал-Алӣ Ас-Сабоҳ ва раиси Девони Валиаҳди Давлати Кувайт Шайх Сомир Ҷобир Ал-Аҳмад Ал-Ҷобир Ас-Сабоҳ мулоқот намуд.

Тавре ба АМИТ «Ховар» аз Сафорати Ҷумҳурии Тоҷикистон дар Давлати Кувайт иттилоъ доданд, дар вохӯрӣ зимни арзёбии вазъи кунунӣ ва чашмандози густариши муносибатҳои Тоҷикистон ва Кувайт ва баррасии роҳҳои таҳкиму тавсеаи ҳамкории мутақобили судманд дар арсаҳои гуногун, аҳаммияти амалисозии тафоҳуму тавофуқҳое, ки байни сарони ду мамлакат дар ҷараёни боздиди расмии Президенти Ҷумҳурии Тоҷикистон, Пешвои миллат  муҳтарам Эмомалӣ Раҳмон аз Давлати Кувайт 3-5 ноябри 2024 ҳосил шуда буданд, таъкид гардид.

Дар ин замина баён шуд, ки дар марҳилаи баъдӣ бояд таваҷҷуҳи тарафайн ба афзоиши ҳаҷми тиҷорати дуҷониба, таҳия ва амалисозии лоиҳаҳои муштараки сармоягузорӣ, ҷалби гардишгарони Кувайт ба Тоҷикистон, густариши табодули фарҳангӣ, афзоиши парвозҳои мустақим байни Кувайт ва Душанбе ва ғайра равона гардад.

АКС: Сафорати Ҷумҳурии Тоҷикистон дар Давлати Кувайт