Дар Душанбе доир ба саҳми Пешвои миллат дар рушди забони тоҷикӣ ҳамоиш баргузор шуд

ДУШАНБЕ, 05.10.2026 /АМИТ «Ховар»/. Имрӯз дар Донишгоҳи технологии Тоҷикистон бахшида ба Рӯзи забон ва Рӯзи омӯзгорон таҳти унвони «Саҳми Пешвои миллат дар рушди забони тоҷикӣ» конференсияи илмӣ–назариявӣ доир гардид, иттилоъ доданд ба АМИТ «Ховар» аз ин донишгоҳ.

Дар ҳамоиш иброз гардид, ки 5 октябр дар Тоҷикистон   Рӯзи забони давлатӣ  таҷлил мешавад. Маҳз дар ҳамин рӯз, 5 октябри соли 2009 Қонун «Дар бораи забони давлатии Ҷумҳурии Тоҷикистон»  қабул гардид. Он  дурнамои рушди забонро дар асоси меъёрҳои муқарраргардида дар иртибот ба вазъи ҳуқуқӣ, аз ҷумла меъёрҳои истифодаи дигар забонҳо дар шароити кунунии муносибатҳои дохилӣ ва хориҷии мамлакат танзим ва муқаррар менамояд.

Таъкид шуд, ки забон ба унвони падидаи фарҳанги миллӣ аз замони пайдоиш барои нигаҳдории таърих, арзишҳои маънавии миллат, анъана ва суннатҳои мардумӣ хизмат карда, ҳамчун муҳимтарин унсури бақои миллат худро муаррифӣ намудааст. Тавассути забон дар ҳофизаи хаттии миллатҳо маҷмуи тафаккур ва андешаи мардум ҳамчун мероси маънавӣ аз наслҳои гузашта то имрӯз нигаҳдорӣ гардидааст, ки ба таҳкими худшиносию худогоҳии миллӣ мусоидат мекунад.

Президенти Ҷумҳурии Тоҷикистон муҳтарам Эмомалӣ Раҳмон иброз намудаанд, ки «мо вазифадорем ин хазинаи бемислро чун гавҳари чашм ҳифз намоем ва барои устувор гардонидани пояҳои забони давлатиамон ҳарчи бештар заҳмат кашем. Зеро, андеша ва идеяи миллии ҳар халқ дар забону адабиёт ва фарҳангу ҳунараш ифода ёфта, дар тафаккуру маърифати фарзандони он ташаккул меёбад».

АКС: Донишгоҳи технологии Тоҷикистон