Шиносоии Пешвои миллат Эмомалӣ Раҳмон бо рафти корҳои азнавсозӣ дар Ҷамъияти саҳҳомии кушодаи Осоишгоҳи “Зумрад”

Март 24, 2017 12:30

ДУШАНБЕ, 24.03.2017 /АМИТ «Ховар»/. Дар шаҳри Исфара Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо рафти корҳои азнавсозӣ дар Ҷамъияти саҳҳомии кушодаи Осоишгоҳи “Зумрад” шинос шуданд.

Зимни шиносоӣ аз шароити нави осоишгоҳ, ки коргарону мутахассисони Ҷамъияти саҳҳомии пӯшидаи “Сомонсуғд” баҳри мустаҳкамнамоии пойгоҳи моддию техникии осоишгоҳ барои мизоҷон муҳайё кардаанд, иттилоъ дода шуд, ки дар рафти корҳо бинои рақами 4 аз таъмири асосӣ бароварда шуда, хизматрасонии ошхонаи осоишгоҳ ба талаботи рӯз мутобиқ карда шудааст.

Аз тарафи кормандони Ҷамъияти саҳҳомии пӯшидаи “Сомонсуғд” ҳамчунин дар ҳудуди осоишгоҳ бо мақсади таъмини пурраи ошхонаи осоишгоҳ бо гӯшт, шир, сабзавоту полезӣ фермаи моливу ширӣ, паррандапарварӣ ва 4 адад гармхона бунёд карда шудааст.

Бо мақсади ба як ҷойи боз ҳам хушбоду ҳаво ва дилнишин мубаддал гардонидани ин мавзеъ дар осоишгоҳ 4 ҳазор бех дарахтони мевадиҳанда, 1000 дона дарахтони ороишӣ ва 11 ҳазор бех гули гуногун шинонида шудааст.

Дар маҷмуъ барои корҳои таъмиру таҷдиди осоишгоҳ аз ҷониби соҳибкорони ватанӣ беш аз 20 миллион сомонӣ сарф гардидааст.

Дар ҳамин ҷо Президенти мамлакат муҳтарам Эмомалӣ Раҳмон барои бунёди меҳмонхонаи нави осоишгоҳи “Зумрад” санги асос гузоштанд.

Меҳмонхона аз таҳхона ва 6 ошёна иборат буда, дар таҳхона ташкил намудани хуҷраҳои ташхисию табобатӣ бо таҷҳизоти муосири соҳавӣ дар назар дошта шудааст. Дар ошёнаи якум қабулгоҳ ва ҳуҷраҳои қабули табибон, инчунин толори варзишӣ-фитнес, нуқтаҳои тиббӣ, фурӯши рӯзномаю маҷаллаҳо, армуғонҳо ва кошонаи ҳусн, дар ошёнаи дуюм маҷлисгоҳ, ошхона ва дар ошёнаҳои болоӣ ҳуҷраҳои истиқоматӣ барои 300 нафар истироҳаткунанда — аз ҳуҷраҳои як ва дунафара ба нақша гирифта шудааст. Ҳамаи ҳуҷраҳо мутобиқ ба талаботу меъёрҳои стандарти муосир бунёду муҷаҳҳаз ва бо шабакаи ҷаҳонии интернет пайваст карда хоҳанд шуд. Боми бино низ барои истироҳату фароғат ва ҳам пешбурди амалҳои иқлимшифоӣ — табобат бо нури офтоб пешбинӣ шудааст. Тибқи нақша дар ду соли оянда барои истироҳату фароғат ва табобати 1200 нафар шароит фароҳам оварда мешавад. Ҳамзамон бо ин 300 ҷойи нави корӣ таъсис дода мешавад, ки барои ба шуғл фаро гирифтани сокинони маҳаллӣ бо кор мусоидат менамояд.

Дар шафати бинои мазкур низ мутобиқи лоиҳаи муосир аквапарк бунёд карда мешавад.

Ба Сарвари давлат муҳтарам Эмомалӣ Раҳмон ҳамчунин Лоиҳаи бунёди Маркази ташхисӣ-табобатии муосир иборат аз 2 — ошёна дар даромадгоҳи осоишгоҳ муаррифӣ карда шуд. Дар ин ҷо инчунин сохтмони қароргоҳи ҳукуматӣ барои қабули меҳмонони фахрӣ ба нақша гирифта шудааст, ки дар масоҳати 5,6 гектар замини ҷудогардида мутобиқ ба меъёрҳои байналхалқӣ бунёд карда хоҳад шуд. Қароргоҳ аз меҳмонхона, табобатгоҳ, тарабхона, майдони варзишӣ, ҳавзҳои тобистона ва зимистонаи шиноварӣ, толорҳо барои гузаронидани гуфтушуниду ҷаласаҳо, фаввораю гулгаштҳо ва дигар нуқтаҳои хизматрасонӣ иборат мебошад.

Баъди шиносоӣ бо шароити кору хизматрасонӣ дар Осоишгоҳи “Зумрад” Президенти мамлакат муҳтарам Эмомалӣ Раҳмон ба соҳибкорони ватанӣ бобати муҳайё намудани шароити хуби истироҳату табобат ва тавонбахшӣ, таъсиси ҷойҳои нави корӣ ва дигар иқдомоти шоиста баҳои баланд дода, ба онҳо барору комёбиҳои нав орзу намуданд.

Март 24, 2017 12:30

Хабарҳои дигари ин бахш

Пешвои миллат Эмомалӣ Раҳмон дар деҳоти Булёни поёни ноҳияи Данғара Муассисаи таълимии томактабии «Дурахшон»-ро ифтитоҳ намуданд
Сарвари давлат Эмомалӣ Раҳмон дар деҳаи Булёни поёни деҳоти Хуррамшаҳри ноҳияи Данғара Муассисаи таҳсилоти миёнаи умумии №11-ро ба истифода доданд
Президенти Тоҷикистон Эмомалӣ Раҳмон дар деҳаи Навободи деҳоти Исмат Шарифови ноҳияи Данғара Муассисаи таҳсилоти миёнаи умумии №86-ро мавриди истифода қарор доданд
Пешвои миллат Эмомалӣ Раҳмон дар ноҳияи Данғара Муассисаи таълимии томактабии №8-ро ифтитоҳ намуданд
Сарвари давлат Эмомалӣ Раҳмон дар деҳаи Булёни болои ноҳияи Данғара бинои Муассисаи таҳсилоти миёнаи умумии рақами 15-ро ба истифода доданд
Президенти Тоҷикистон Эмомалӣ Раҳмон бо фаъолияти Хоҷагии деҳқонии «Саодатшо» ва дастовардҳои кишоварзии ноҳияи Данғара шинос шуданд
Пешвои миллат Эмомалӣ Раҳмон роҳи мошингарди Ҳусеншайх – Хуррамзамини ноҳияи Данғараро ба истифода доданд
Сарвари давлат Эмомалӣ Раҳмон дар деҳаи Алиҷони деҳоти Пушинги ноҳияи Данғара Муассисаи таҳсилоти миёнаи умумии №24-ро мавриди истифода қарор доданд
Президенти Тоҷикистон Эмомалӣ Раҳмон дар деҳаи Алиҷони деҳоти Пушинги ноҳияи Данғара Муассисаи томактабии «Ворисон»-ро ифтитоҳ намуданд
Пешвои миллат Эмомалӣ Раҳмон дар деҳаи Ғиҷоваки ноҳияи Данғара бо рафти корҳои сохтмонии марҳилаи дуюми корхонаи «Муосир» шинос шуданд
Сарвари давлат Эмомалӣ Раҳмон дар деҳаи Рахшонзамини ноҳияи Данғара бо гузоштани санги асос ба сохтмони бинои Муассисаи таҳсилоти миёнаи умумӣ оғоз бахшиданд
Президенти Тоҷикистон Эмомалӣ Раҳмон дар ноҳияи Данғара барои сохтмони бинои Муассисаи таҳсилоти миёнаи умумӣ дар кӯчаи ба номи Оимхол Абдуллоева санги асос гузоштанд