ҶАЛАСА ДАР НЮ-ЙОРК ТАҲТИ РАЁСАТИ ЭМОМАЛИ РАҲМОН

Имрўз 24 сентябри соли 2008 дар бинои Маҷмаи кулли Созмони Милали Муттаҳид дар шаҳри Ню-Йорк таҳти раёсати Президенти Ҷумҳурии Тоҷикистон Эмомалӣ Раҳмон чорабинии сатҳи олии «Об ва санитария барои ҳама» ҷараён мегирад, ки дар ҳошияи Иҷлосияи  63– юми Маҷмаи кулли Созмони Милали Муттаҳид баргузор мегардад.Ин албатта гувоҳӣ аз нақши намоёни Тоҷикистон дар ҳаллу фасли мушкилоти ҷаҳонии обӣ  ва қабул гаштану  татбиқшавии пешниҳодоти Сарвари давлати Тоҷикистон Эмомалӣ Раҳмон дар ин соҳа аст. Аз ҷониби ҷомеаи ҷаҳонӣ Даҳсолаи байналмилалии тадбирҳои «Об барои ҳаёт» эълон гаштани солҳои 2005-2015 аз ҷумлаи чунин ташаббусҳои наҷиб аст, ки босамар татбиқ мегардад.Худи ҳамин рўз ҳамчунин мулоқотҳои Президенти Ҷумҳурии Тоҷикистон Эмомалӣ Раҳмон бо Дабири кулли Созмони Милали Муттаҳид Пан Ги Мун, Муовини Котиби давлатии Иёлоти Муттаҳидаи Амрико ва роҳбарони як зумра давлатҳои ҷаҳон ва дигар ходимони сиёсию ҷамъиятии сатҳи баланди давлатию байналмилалӣ дар назар аст.              Дар ин бора ба АМИТ «Ховар» Котиби матбуоти Президенти Ҷумҳурии Тоҷикистон Абдуфаттоҳ Шарифзода телефонӣ аз шаҳри Ню-Йорки ИМА иттилоъ дод.