АЗ МАРЗБОНОН МИҚДОРИ ЗИЁДИ МАВОДИ НАШЪАДОР МУСОДИРА КАРДА ШУД

Душанбе, 24 сентябр. (АМИТ «Ховар», Мавҷуда Давлатзода). – Кормандони шӯъбаи корҳои дохилии ноҳияи Ҳамадонӣ аз гурӯҳи марзбонони қисми ҳарбии 2133 Раёсати умумии артиши марзбони Кумитаи давлатии амнияти миллии ҷумҳурӣ бештар аз 25 килограм маводи нашъадорро мусодира намуданд. Кормандони милиса дар давоми амалиёт се хизматчии ҳарбиро ба нигоҳ доштани маводи нашъадор гумонбар шуда, дастгир намуданд. Зимни аз назар гузаронидани дастгиршудагон дар халтаи либосҳои яке аз онҳо 17 килограму 180 грам кӯкнор ва 8 килограму 290 грам афюни хом ёфт шуд. Кормандони милиса айни ҳол хизматчиёни ҳарбии ба ин ҷиноят шарикбударо муайян месозанд. Номи онҳо барои махфӣ нигоҳ доштани ҷараёни тафтиш зикр карда намешавад. Аз рӯи ин воқеа парвандаи ҷиноӣ кушода шуд ва дафтари аъмоли ҷинояткорон тафтиш карда мешавад.