ДАР ДОНИШГОҲИ ДАВЛАТИИ БА НОМИ М.ЛОМОНОСОВ ЗАБОНИ ТОҶИКӢ МЕОМӮЗАНД

Маскав, 17 сентябр. (АМИТ «Ховар», Ҳалима Хушқадамова). — Аз 1 сентябри соли равон сар карда, омӯзиши забони тоҷикӣ ҳамчун забони алоҳидаи иловагии шарқӣ дар Донишкадаи мамлакатҳои Осиё ва Африқои Донишгоҳи давлатии Маскав ба номи М. Ломоносов ба роҳ монда шуд. Соли ҷорӣ дар ин ҷо забони тоҷикӣ дар факултаи таърих омӯхта мешавад. Қабл аз ин дар давоми 7 соли гузашта забони тоҷикӣ танҳо дар баъъзе шӯъбаҳо омӯхта мешуд. Донишҷӯёни мамлакатҳои ИДМ ва мамлакатҳои хориҷӣ ба омӯхтани забони тоҷикӣ мароқи калон зоҳир мекунанд. Дар донишгоҳ барномаи махсуси омӯзиши забони тоҷикӣ тартиб дода шудааст. Дар донишгоҳи мазкур аз рӯзҳои аввали мавҷудияти он забони халқҳои минтақаи Қафқоз ва Осиёи Марказӣ, аз ҷумла, забонҳои озарӣ, арманӣ, қазоқӣ, тоҷикӣ, туркманӣ ва ӯзбекӣ ба роҳ монда шуда буд. Ин забонҳоро донишҷӯёни гурӯҳҳо ва шӯъбаҳои алоҳида меомӯхтанд. Акнун дар заминаи Маркази таълимии Қафқоз ва Осиёи Марказӣ кафедраи алоҳидаи Осиёи Марказӣ ва Қафқоз таъсис дода шуд.