ДАР КӮЛОБ КОРХОНАҲОИ САНОАТӢ БА КОР САР КАРДАНД

                     Душанбе, 14 март. (АМИТ «Ховар», Лаззат Диловарзод).- Лимити барқ дар шаҳри Кӯлоб бардошта шуд. Корхонаҳое, ки таи 5-6 моҳи охир бо сабаби ҷорӣ шудани лимит аз фаъолият боз монда буданд, аз нав ба кор сар карданд.                    Яке аз чунин корхонаҳо корхонаи муштараки Кӯлобу Австрия «Кӯлоб текстайлз» аст, ки аз рӯзи 10-уми март корро дар се баст оғоз кард. Корхона дар як шабонарӯз 90 тонна пахтаро коркард менамояд. Маҳсулоти коркардшудаи корхона бо сифати байналмилалӣ ҷавобгӯ буда, дар асоси шартномаҳои байналмилалӣ ба хориҷи кишвар содир карда мешавад. Корхона соли ҷорӣ тамоми пахтаи ноҳияи Кӯлобро коркард ва ба хориҷи кишвар бароварданист. Мутахассисони корхона кӯшиш доранд, бо ташкили чанд хатҳои нави технологӣ садҳо нафар сокинони шаҳрро бо ҷои нави корӣ таъмин намоянд.