ҲАМКОРИИ ВАЗОРАТҲОИ МУДОФИА ЯКЕ АЗ САМТҲОИ МУҲИМТАРИНИ ФАЪОЛИЯТИ С&

               Маскав, 4 май. (АМИТ «Ховар», Ҳалима Хушқадамова). — Дар Маскав машварати вазирони мудофиаи мамлакатҳои аъзои СҲШ баргузор гардид. Дар он натиҷаҳои ҳамкории вазоратҳо ҷамъбаст ва нақшаҳои ояндаи ҳамкории онҳо муайян карда шуданд. Вазирони мудофиаи Қазоқистон, Қирғизистон, Чин, Русия Тоҷикистон ва Ӯзбекистон роҷеъ ба масъалаҳои гуногуни таъмини амнияти минтақавӣ ва байналхадлқӣ табодули назар намуданд. Президенти Русия Дмитрий Медведев бо иштирокчиёни машварати мазкур мулоқот кард.                    Зимни сӯҳбат масъалаҳои вобаста ба рушди ояндаи фаъолияти СҲШ ва тақвияти нақши он дар таъмини амнияту суботи вазъияти минтақа баррасӣ карда шуданд. Иштирокчиёни машварат ҳамчунин масъалаҳои муҳимтарини марбут ба таъмини амнияти байналхалқию минтақавӣ, такмили имкониятҳои пурзӯр намудани муборизаи мамлакатҳои аъзои созмонро ба муқобили терроризм баррасӣ карданд. Ҳамкории вазоратҳои мудофиа яке аз самтҳои муҳимтарини фаъолияти СҲШ мебошад, гуфт Д.Медведев. — Боварӣ дорам, ки чунин мулоқотҳо давом дода мешаванд, зеро онҳо барои ҳалли масъалаҳои рӯзмарра хеле заруранд.                   Мухбири АМИТ «Ховар» хабар медиҳад, ки дар ин машварат вазири мудофиаи Тоҷикистон Шералӣ Хайруллоев иштирок дошт.