БОЗГАШТИ 10 ҲАЗОР МУҲОҶИР ДАР НАЗАР АСТ

              Душанбе, 6 июл. (АМИТ «Ховар», Лаззат Диловарзод).- Аз рӯи маълумоти расмӣ дар бозори Черкизи шаҳри Москва беш аз 10 ҳазор муҳоҷирони меҳнатӣ ба кор фаро гирифта шудаанд, ки як қисми онҳо дар қайд нестад.              Бо қарори маъмурияти округи шарқии пойтахти ФР фаъолияти бозори Черкизи шаҳри Москва бо сабаби даҳҳо қоидавайронкуниҳо баста шуд. Дар ин бозор қисми зиёди коргаронро аробакашҳо ва фурӯшандаю ёрдамчиёни кирокардашуда ташкил медиҳанд. Шумораи ингуна коргарон аз Ҷумҳурии Тоҷикистон ба 10 ҳазор нафар мерасад. Кушодани бозор дар наздиктарин вақт пешбинӣ нашудааст. Пайдо кардани кори дилхоҳ барои коргарони аз кор маҳрумгашта дар муддати ду-се моҳи оянда номумкин аст. Бинобар ин муҳоҷирони меҳнатии Тоҷикистонро ҷузъ бозгашт ба ватан роҳи дигаре нест. Аз ин рӯ мақомоти иҷроияи маҳаллии ҳокимияти давлатии шаҳру навоҳии ҷумҳуриро зарур аст, ки барои ин миқдор муҳоҷир ҷойҳои нави кориро омода созанд.